Live Updates

فیصل آباد چیمبر کے صدر کا ممبرشپ کی تجدید کی آخری تاریخ میں ایک ماہ کی توسیع کا مطالبہ

منگل 24 مارچ 2026 19:20

فیصل آباد (اُردو پوائنٹ اخبارتازہ ترین - اے پی پی۔ 24 مارچ2026ء) فیصل آباد چیمبر آف کامرس اینڈ انڈسٹری (ایف سی سی آئی) کے صدر، فاروق یوسف شیخ نے موجودہ علاقائی صورتحال کے پیش نظر ممبرشپ کی تجدید کی آخری تاریخ میں ایک ماہ کی توسیع کا مطالبہ کیا ہے۔تاجروں کے اجلاس سے خطاب کرتے ہوئے انہوں نے ایران اور اسرائیل کے درمیان بڑھتی ہوئی کشیدگی پر تشویش کا اظہار کیا اورکہا کہ موجودہ اندرونی اور بیرونی صورتحال کی وجہ سے چیمبر کے زیادہ تر ممبران معمول کے مطابق کاروبار کرنے میں مشکلات کا سامنا کر رہے ہیں اور وہ ممبر شپ کی تجدید پر فوکس نہیں کر رہے۔

اِن حالات میں موجودہ مدت میں توسیع اور لچکدار پالیسیوں کی ضرورت ہے۔ انہوں نے کہا کہ ہمیں معاشی عمل کو جاری رکھنے کیلئے زمینی حقائق کے مطابق فیصلے کرنے ہوں گے۔

(جاری ہے)

انہوں نے ڈی جی ٹی او سے کہا کہ تجدید کیلئے اعلان کردہ تاریخ 31مارچ2026ء کو ختم ہو رہی ہے مگر بہت کم ممبران نے اپنی رکنیت کی تجدید کرائی ہے۔ اس لئے رکنیت کی تجدید کرانے کی تاریخ میں کم از کم ایک ماہ کا اضافہ کیا جائے۔

انہوں نے فیصل آباد چیمبر آف کامرس اینڈ انڈسٹری کی جانب سے قوم اور خاص طور پر فیصل آباد کی بزنس کمیونٹی کو یوم پاکستان کی مبارکباد پیش کی ہے۔ 23 مارچ ہماری تاریخ کا ایک اہم سنگِ میل ہے جو ہمیں ہماری آزادی کے لیے دی جانے والی قربانیوں کی یاد دلاتا ہے۔ انہوں نے کہاکہ کاروباری برادری پاکستان کی معیشت کو مضبوط بنانے، ترقی کو آگے بڑھانے اور روزگار کے نئے مواقع پیدا کرنے میں اہم کردار ادا کرتی ہے۔