Live Updates

آل پاکستان انجمن تاجران کا پیٹرولیم کی قیمتیں بر قرار رکھنے پر وزیر اعظم سے اظہار تشکر

وزیر اعظم کی قیادت میں پاکستان نے دیگر ممالک کے مقابلے میں بہترین حکمت عملی اپنائی ‘ صدر اشرف بھٹی

اتوار 29 مارچ 2026 12:25

لاہور(اُردو پوائنٹ اخبارتازہ ترین - این این آئی۔ 29 مارچ2026ء) آل پاکستان انجمن تاجران کے مرکزی صدر اشرف بھٹی نے وزیر اعظم شہباز شریف کی جانب سے پیٹرول 95 اور ڈیزل 203 روپے بڑھانے کی سمری مستردکرنے پر اظہارتشکر کرتے ہوئے کہا ہے کہ عوام پیٹرولیم قیمتوں میں اتنے بڑے پیمانے پر اضافے کا بوجھ اٹھانے کے متحمل نہیں ہو سکتے۔

(جاری ہے)

اپنے بیان میں انہوں نے کہا کہ یہ درست ہے کہ جنگ کی صورتحال کی وجہ سے عالمی منڈی میں پیٹرولیم کی قیمتوں میں غیر معمولی اضافہ ہوا ہے لیکن پاکستان کے عوام بھاری ٹیکسز کی وجہ سے پہلے ہی پیٹرولیم مصنوعات مہنگے داموں خریدنے پر مجبور ہیں جبکہ رہی سہی کسر 55روپے لیٹر اضافے نے نکال دی ہے ۔

انہوں نے کہا کہ وزیر اعظم شہباز شریف کی قیادت میں پاکستان نے دیگر ممالک کے مقابلے میں بہترین حکمت عملی اپنائی جس کی وجہ سے عوام عالمی منڈی میں ہونے والے اضافی اثرات سے محفوظ ہیں۔ انہوں نے کہا کہ حکومت سے اپیل ہے کہ وزراء ، اراکین اسمبلی اور سرکاری محکموں کے افسران کو دی جانے والی مراعات پر موجودہ صورتحال میں سو فیصد کٹوتی کی جائے تاکہ پسے ہوئے طبقات کو ریلیف مل سکے۔