زرعی یونیورسٹی میں ”کلائمیٹ سمارٹ لینڈ سکیپ“ کے عنوان سے کانفرنس

منگل 7 اپریل 2026 17:39

فیصل آباد (اُردو پوائنٹ اخبارتازہ ترین - اے پی پی۔ 07 اپریل2026ء) زرعی یونیورسٹی فیصل آباد کے انسٹی ٹیوٹ آف ہارٹیکلچرل سائنسز کے زیر اہتمام ”کلائمیٹ سمارٹ لینڈ سکیپ“ کے عنوان سے کانفرنس کا انعقاد کیا گیا۔ منگل کو منعقدہ کانفرنس سے خطاب کرتے ہوئے یونیورسٹی کے ڈین پروفیسر ڈاکٹر غلام مرتضیٰ نے کہا کہ موسمیاتی تبدیلی سے ہم آہنگ لینڈ اسکیپ ملک کے شہری اور دیہی ترقی کے لیے ناگزیر ہے۔

جدید لینڈ اسکیپنگ کو محض ظاہری خوبصورتی تک محدود نہیں رہنا چاہیے بلکہ اس میں ماحولیاتی مضبوطی کو بھی شامل کرنا ضروری ہے۔ انہوں نے کہا کہ کلائمیٹ اسمارٹ طریقہ کار ماحولیاتی توازن، پانی کے تحفظ اور حیاتیاتی تنوع کو یکجا کر کے ایسے مناظر تخلیق کرتا ہے جو نہ صرف خوبصورت بلکہ ماحول دوست اور پائیدار بھی ہوتے ہیں۔

(جاری ہے)

ڈائریکٹر ہارٹیکلچر پروفیسر ڈاکٹر احمد ستار خاں نے کہا کہ بدلتے ہوئے ماحول کے اثرات سے بچاؤ کے لیے کلائمیٹ اسمارٹ لینڈ اسکیپ کو فروغ دینا وقت کی اہم ضرورت ہے۔

انہوں نے کہا کہ بڑھتا ہوا درجہ حرارت، بے ترتیب بارشیں اور زمین کی زرخیزی میں کمی لینڈ اسکیپ منصوبہ بندی میں جدید حل کی متقاضی ہیں۔ ڈاکٹر محمد اسلم خاں نے کلائمیٹ اسمارٹ زراعت کے لیے یونیورسٹی کے اقدامات کو سراہا اور کہا کہ شجرکاری مہم میں ہر فرد کو اپنا کردار ادا کرنا ہوگا۔ منتظم پروفیسر ڈاکٹر عدنان یونس نے کہا کہ موسمیاتی تغیر کے پیش نظر روایتی طریقوں کو ترک کر کے وسائل کے مؤثر استعمال پر مبنی باغبانی کے متبادل طریقہ کار کو اپنانا ہوں گے۔

انہوں نے کہا کہ ایسی حکمت عملی اپنانا ہوگی جو ماحولیاتی نظام کو مضبوط کرے اور دیرپا پائیداری کو یقینی بنائے۔ فاطمہ فرٹیلائزر سے عتیق الرحمان، اسپرٹ انٹرنیشنل کے بانی ملک محسن شہزاد، ڈاکٹر عاطف ریاض، ڈاکٹر احسن اکرم، ڈاکٹر ایم آصف، ڈاکٹر عامر نواز، ڈاکٹر عمیر شفیق، ڈاکٹر محمد اعظم، ڈاکٹر مہک، ڈاکٹر گلزار، ڈاکٹر امان اللہ، ڈاکٹر وسیم قادری، سید علیم تقی، ایم عاطف، ایم منیب اور ایم بہزاد رفیق نے بھی باغبانی اور موسمیاتی مطابقت کے مختلف پہلوؤں پر روشنی ڈالی۔