میٹرک امتحانات 2026 میں شفافیت کا عملی مظاہرہ، نقل کے خلاف سخت کارروائیاں جاری

بدھ 8 اپریل 2026 19:44

راولپنڈی (اُردو پوائنٹ اخبارتازہ ترین - اے پی پی۔ 08 اپریل2026ء) وزیراعلیٰ پنجاب مریم نواز شریف کے ویژن پر بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر اہتمام میٹرک کا پہلا سالانہ امتحان 2026 مکمل شفافیت، نظم و ضبط اور پرامن ماحول میں جاری ہے۔ تعلیمی بورڈ کی انتظامیہ کی جانب سے امتحانی عمل کو جدید تقاضوں سے ہم آہنگ کرتے ہوئے مؤثر نگرانی اور سخت اقدامات کو یقینی بنایا گیا ہے۔

کمشنر راولپنڈی و چیئرمین تعلیمی بورڈ انجینئر عامر خٹک نے امتحانی مراکز کے دوروں اور انتظامی اجلاسوں کے دوران واضح کیا ہے کہ امتحانی ایس او پیز پر زیرو ٹالرنس پالیسی نافذ ہے۔ انہوں نے کہا کہ امتحانی نظام میں شفافیت، میرٹ اور دیانت داری کو ہر قیمت پر یقینی بنایا جائے گا اور اس سلسلے میں کسی قسم کی رعایت نہیں برتی جائے گی۔

(جاری ہے)

انہوں نے مزید کہا کہ نقل ایک سنگین جرم ہے جس کے خاتمے کے لیے تعلیمی اداروں، نگران عملے اور والدین کو مشترکہ کردار ادا کرنا ہوگا۔

انتظامیہ کی جانب سے امتحانی مراکز کی نگرانی کے لیے کمانڈ اینڈ کنٹرول روم قائم کیا گیا ہے، جہاں جدید ٹیکنالوجی کی مدد سے تمام مراکز کی آن لائن مانیٹرنگ جاری ہے۔ اس نظام کے تحت امتحانی سرگرمیوں پر مسلسل نظر رکھی جا رہی ہے تاکہ کسی بھی غیر قانونی سرگرمی کو بروقت روکا جا سکے۔ اس اقدام سے نہ صرف امتحانی شفافیت میں اضافہ ہوا ہے بلکہ نقل مافیا کے حوصلے بھی پست ہوئے ہیں۔

دریں اثناء کنٹرولر امتحانات تنویر اصغر اعوان نے گورنمنٹ ہائی سکول گھوڑا گلی مری کے امتحانی مرکز کا اچانک دورہ کیا، جہاں دورانِ کارروائی تین امیدواروں کو نقل کرتے ہوئے رنگے ہاتھوں گرفتار کر لیا گیا۔ کنٹرولر امتحانات کے مطابق یہ امیدوار امتحانی قواعد کی خلاف ورزی کے مرتکب پائے گئے، جس پر فوری طور پر ان کے خلاف کیسز رجسٹر کر لیے گئے ہیں اور مزید کارروائی کے لیے ڈسپلن برانچ کو ارسال کر دیا گیا ہے۔