ٹیلیوژن، سٹیج اور فلم کے لیجنڈ، مزاحیہ اداکار ،میزبان معین اختر کی برسی22اپریل کومنائی جائے گی

برسی کے موقع پر علمی، ادبی حلقوں اور شو بز انڈسٹری کے زیر اہتمام مختلف تقاریب کا انعقاد کیا جائے گا ،ان کو خراج تحسین پیش کیا جائیگا

ہفتہ 18 اپریل 2026 22:30

لاہور(اُردو پوائنٹ اخبارتازہ ترین - این این آئی۔ 18 اپریل2026ء) پاکستان ٹیلیوژن، سٹیج اور فلم کے لیجنڈ،مزاحیہ اداکار اور میزبان معین اختر کی برسی22اپریل کومنائی جائے گی۔ انہوں نے بطور ہدایت کار، پروڈیوسر، گلوکار اور مصنف بھی فرائض سر انجام دیئے۔ روشنیوں کے شہر کراچی سے تعلق رکھنے والے معین اختر نے پاکستان ٹیلی ویژن پر اپنے کام کا آغاز 6ستمبر 1966 کو پاکستان کے پہلے یوم دفاع کی تقاریب کے لیے کیے گئے پروگرام سے کیاجس کے بعد انہوں نے کئی ٹی وی ڈراموں، سٹیج شوز میں کام کرنے کے بعد انور مقصود اور بشرہ انصاری کے ساتھ ٹیم بنا کر متعدد معیاری پروگرام بھی کئے۔

معین اختر نے کئی زبانوں میں مزاحیہ اداکاری کی ہے جن میں انگریزی، سندھی، پنجابی، میمن، پشتو، گجراتی اور بنگالی کے علاوہ کئی دیگر زبانیں شامل ہیں، اردو میں انکا کام انکو بچے بڑے، ہر عمر کے افراد میں یکساں مقبول بناتا ہے۔

(جاری ہے)

وہ اداکار لہری سے متاثر تھے ۔ان کے ٹی وی ڈراموں اور پروگراموں کو شمار کرنا محال ہے۔معین اختر مرحوم کو ان کی خدمات کے اعتراف میں حکومت پاکستان کی طرف سے تمغہ حسن کارکردگی اور ستارہ امتیاز سے بھی نوازا گیا۔

واضح رہے کہ لیجنڈ اداکار معین اختر 22اپریل 2011 کو دل کا دورہ پڑنے سے کراچی میں انتقال کر گئے تھے۔ ان کی برسی کے موقع پر علمی، ادبی حلقوں اور شو بز انڈسٹری کے زیر اہتمام مختلف تقاریب کا انعقاد کیا جائے گا اور ان کی خدمات پر ان کو خراج تحسین بھی پیش کیا جائے گا۔