سمعیہ ساجد کاکپواڑہ کے کشمیری خاندان کی قربانیوں کو خراج عقیدت

کشمیری عوام کے عزم، حوصلے اور جذبہ حریت کی روشن مثال ہیں، چیئرپرسن خواتین ونگ، راجہ اظہار کے بھائی، بیٹے کی وفات پر گہرے دکھ، رنج اور افسوس کا اظہار کیا ہے

پیر 27 اپریل 2026 14:47

مظفرآباد(اُردو پوائنٹ اخبارتازہ ترین - این این آئی۔ 27 اپریل2026ء) مسلم کانفرنس خواتین ونگ کی مرکزی چیئرپرسن و سابق امیدوار اسمبلی ویلی 06 محترمہ سمعیہ ساجد نے کپواڑہ کے غیور عوام اور سیز فائر لائن پر آباد کشمیریوں کی تحریک آزادی کے لیے دی جانے والی لازوال قربانیوں کو تاریخ کا سنہری اور ناقابلِ فراموش باب قرار دیتے ہوئے کہا ہے کہ یہ قربانیاں کشمیری عوام کے عزم، حوصلے اور جذبہ حریت کی روشن مثال ہیں۔

انہوں نے مقبوضہ کیرن کے حریت پسند رہنما راجہ اظہارِ خان کے بھائی اور بیٹے کی وفات پر گہرے دکھ، رنج اور افسوس کا اظہار کرتے ہوئے سوگوار خاندان سے دلی تعزیت اور مکمل یکجہتی کا اظہار کیا۔ انہوں نے کہا کہ اس طرح کے سانحات پوری قوم کا مشترکہ دکھ ہیں اور ہم سب اس غم میں برابر کے شریک ہیں۔

(جاری ہے)

سمعیہ ساجد نے کہا کہ راجہ اظہار خان اور ان کے خاندان نے تحریک آزادی کشمیر کے لیے بے مثال جانی و مالی قربانیاں دے کر تاریخ رقم کی ہی اور ان کی یہ قربانیاں اس بات کا واضح ثبوت ہیں کہ کشمیری عوام اپنے بنیادی حق خودارادیت کے حصول کے لیے کسی بھی قربانی سے دریغ نہیں کریں گے۔

انہوں نے کہا کہ کپواڑہ، کیرن اور سیز فائر لائن کے ساتھ آباد بہادر کشمیری عوام روزانہ کی بنیاد پر مشکلات، خوف اور غیر یقینی صورتحال کا سامنا کرنے کے باوجود اپنے حوصلے بلند رکھے ہوئے ہیں، اور ان کا جذبہ آزادی ہر گزرتے دن کے ساتھ مزید مضبوط ہو رہا ہے۔انہوں نے مزید کہا کہ منقسم خاندانوں کے دکھ اور قربانیاں تحریک آزادی کشمیر کا ایک دردناک مگر حقیقت پر مبنی پہلو ہیں، جہاں ایک ہی خاندان کے افراد سرحد کے دونوں جانب بٹے ہوئے ہیں اور ایک دوسرے کے غم و خوشی میں براہ راست شریک ہونے سے محروم ہیں، تاہم دلوں کے رشتے آج بھی مضبوط اور قائم ہیں۔

سمعیہ ساجد نے راجہ ولایت خان مظفرآباد اور مرحوم راجہ لیاقت علی خان تحصیل دار مقبوضہ کشمیر کی وفات پر بھی دلی افسوس کا اظہار کرتے ہوئے کہا کہ وہ اس دکھ کی گھڑی میں لواحقین کے ساتھ کھڑی ہیں اور ان کے غم کو اپنا غم سمجھتی ہیں۔انہوں نے کہا کہ اس طرح کے صدمات قوم کے حوصلوں کو پست نہیں کر سکتے بلکہ یہ قربانیاں تحریک آزادی کشمیر کو مزید تقویت دیتی ہیں اور شہداء و مرحومین کا مشن جاری رکھنے کا حوصلہ فراہم کرتی ہیں۔انہوں نے دعا کی کہ اللہ تعالیٰ تمام مرحومین کو اپنی جوار رحمت میں جگہ عطا فرمائے، انہیں جنت الفردوس میں اعلیٰ مقام نصیب کرے اور سوگوار خاندانوں کو صبر جمیل، حوصلہ اور استقامت عطا فرمائے۔