چیئرمین کمپلینٹ سیل پاکستان انٹرنیشنل ہیومن رائٹس آرگنائزیشن کا ڈسٹرکٹ جیل ایبٹ آباد کا دورہ

جمعرات 30 اپریل 2026 13:45

ایبٹ آباد (اُردو پوائنٹ اخبارتازہ ترین - اے پی پی۔ 30 اپریل2026ء) چیئرمین کمپلینٹ سیل پاکستان انٹرنیشنل ہیومن رائٹس آرگنائزیشن شہزاد احمد اور سنٹرل وائس چیئرمین کمپلینٹ سیل ڈاکٹر محمد عثمان خان جدون کی قیادت میں ہیومن رائٹس ہزارہ کی ٹیم نے ڈسٹرکٹ جیل ایبٹ آباد کا اہم دورہ کیا۔ ڈیلیگیشن میں صدر ہزارہ ڈویژن چوہدری محمد حنیف، جنرل سیکریٹری ہزارہ ملک محمد ایاز، جنرل سیکریٹری ایبٹ آباد شیخ نثار احمد اور صدر یوتھ ونگ تحصیل حویلیاں نعمت اللہ خان بمبہ بھی شریک تھے۔

ترجمان چیئرمین کمپلینٹ سیل پاکستان انٹرنیشنل ہیومن رائٹس آرگنائزیشن کی جانب سے جاری بیان کے مطابق وفد نے جیل کے مختلف شعبہ جات کا تفصیلی جائزہ لیا، قیدیوں کو فراہم کی جانے والی سہولیات، صفائی، نظم و ضبط، قانونی معاونت اور بنیادی انسانی حقوق کے تحفظ سے متعلق امور کا مشاہدہ کیا۔

(جاری ہے)

جیل سپرنٹنڈنٹ جنید بخاری اور ان کے سٹاف کے مثبت رویہ، بہترین انتظامی صلاحیت اور قیدیوں کے ساتھ انسانی ہمدردی پر مبنی سلوک کو وفد نے بھرپور سراہا۔

ڈیلیگیشن کے تمام شرکاء نے متفقہ طور پر کہا کہ ایسے ذمہ دار، باصلاحیت اور انسان دوست افسران بہت کم دیکھنے کو ملتے ہیں اور ایسے افسران واقعی خراجِ تحسین کے مستحق ہیں۔ ڈاکٹر محمد عثمان خان جدون نے کہا کہ جیل اصلاحات صرف انتظامی معاملہ نہیں بلکہ انسانی وقار، انصاف اور بنیادی حقوق کے تحفظ کا اہم حصہ ہیں، ایسے افسران معاشرہ میں مثبت تبدیلی کی عملی مثال ہوتے ہیں۔