ایڈیشنل چیف سیکرٹری(ر) نصیب اللہ بازئی کا بلوچستان پنشنرز ویلفیئر ایسوسی ایشن کے دفتر کا دورہ

پیر 4 مئی 2026 19:00

کوئٹہ(اُردو پوائنٹ اخبارتازہ ترین - این این آئی۔ 04 مئی2026ء) ایڈیشنل چیف سیکرٹری (ریٹائر) نصیب اللہ خان بازئی نے پیرکو بلوچستان پینشنرز ویلفیئر ایسوسی ایشن کے دفتر کا دورہ کیا۔ اس موقع پر ایسوسی ایشن کے ایکٹنگ صدر حاجی محمد ارشد گجر نے ان کا پرتپاک استقبال کیا۔ تقریب میں ایسوسی ایشن کے خزانچی زاہد اقبال، پریس سیکرٹری طاہر کاسی، ایگزیکٹو ممبر منظور احمد سربراہ، ایگزیکٹو ممبر اسماعیل ہزارہ اور تربت ڈویژن کے چیئرمین زاہد حسین بھی موجود تھے۔

اس موقع پر صدر حاجی محمد ارشد گجر نے ایسوسی ایشن کو درپیش مالی مشکلات اور دیگر اہم امور کے بارے میں جناب نصیب اللہ خان بازئی کو آگاہ کیا۔ انہوں نے پینشنرز کو درپیش مسائل، خصوصاً مالی تنگیوں، سہولیات کی کمی اور دیگر درپیش چیلنجز پر تفصیل سے روشنی ڈالی۔

(جاری ہے)

نصیب اللہ بازئی نے ایسوسی ایشن کے مسائل کو غور سے سنا اور مکمل تعاون کی یقین دہانی کرواتے ہوئے کہا کہ وہ اپنی بھرپور کوشش کریں گے کہ پینشنرز کے مسائل کو متعلقہ اعلیٰ حکام تک پہنچایا جائے اور ان کے حل کے لیے مؤثر اقدامات کیے جائیں۔

انہوں نے مزید کہا کہ پینشنرز نے ملک و قوم کے لیے گراں قدر خدمات انجام دی ہیں اور ان کی فلاح و بہبود کے لیے ہر ممکن اقدام کیا جانا چاہیے۔اس موقع پر صدر نے ایسوسی ایشن کی جانب سے ایک تفصیلی فائل بھی ان کے حوالے کی جس میں پینشنرز کے مسائل اور تجاویز شامل تھیں۔ دورے کے اختتام پر ایسوسی ایشن کے تمام عہدیداران نے نصیب اللہ بازئی کا شکریہ ادا کیا کہ انہوں نے وقت نکال کر ایسوسی ایشن کا دورہ کیا اور پینشنرز کے مسائل سننے میں خصوصی دلچسپی ظاہر کی۔

متعلقہ عنوان :