Live Updates

پٹرول قیمتوں میں اضافے سے منافع کا جھانسہ، 12 ارب روپے کا مبینہ میگا سکینڈل بے نقاب

18 ویں گریڈ کے متعدد سرکاری افسران شامل، تحقیقات میں 20 سے زائد کمپنیوں، مشکوک پراپرٹی ٹرانسفرز اور مبینہ منی لانڈرنگ کے شواہد سامنے آئے، رقوم سعودی عرب اور سپین منتقل کیے جانے کی تحقیقات جاری

ساجد علی پیر 11 مئی 2026 17:34

پٹرول قیمتوں میں اضافے سے منافع کا جھانسہ، 12 ارب روپے کا مبینہ میگا ..

اسلام آباد (اُردو پوائنٹ اخبارتازہ ترین۔ 11 مئی2026ء) وفاقی دارالحکومت میں 12 ارب روپے کا مبینہ سکینڈل سامنے آیا ہے، جس نے سرکاری حلقوں اور کاروباری دنیا میں کھلبلی مچا دی۔ اے بی این نیوز کے بیورو چیف زمان مغل کی رپورٹ کے مطابق وفاقی دارالحکومت میں پیٹرولیم مصنوعات کی قیمتوں میں اضافے سے بھاری منافع کا جھانسہ دے کر شہریوں سے اربوں روپے بٹورنے کا مبینہ سکینڈل منظرِ عام پر آیا ہے، ابتدائی تحقیقات میں اس نیٹ ورک کے تانے بانے سرکاری افسران اور بین الاقوامی منی لانڈرنگ سے جڑتے دکھائی دے رہے ہیں، اس بڑے مالیاتی فراڈ میں 18 ویں گریڈ کے کئی سرکاری افسران اور معروف پیٹرول پمپ مالکان کے ملوث ہونے کے شواہد ملے ہیں۔

رپورٹ میں ذرائع کا کہنا ہے کہ سرمایہ کاروں کو پٹرول کی بڑھتی ہوئی قیمتوں کا لالچ دے کر پٹرولیم سٹاک میں سرمایہ کاری پر آمادہ کیا گیا، سرمایہ کاروں کو یقین دلایا گیا کہ قیمتیں بڑھنے پر انہیں غیر معمولی منافع ملے گا، ابتدائی طور پر کچھ رقم دے کر اعتماد جیتا گیا، لیکن جلد ہی ادائیگیاں روک دی گئیں اور سرمایہ کاروں کے اربوں روپے ڈوب گئے، اس اسکینڈل کے مرکزی کردار کے طور پر عادل اکرام نامی شخص کا نام سامنے آیا ہے۔

(جاری ہے)

بریکنگ نیوز، 12 ارب روپے کا میگا سکینڈل 18 گریڈ کے متعدد سرکاری افسران شامل ..!!

اے بی این نیوز کے بیورو چیف زمان مغل صاحب کی خبر کے مطابق اسلام آباد میں مبینہ 12 ارب روپے کے پٹرول انویسٹمنٹ سکینڈل کا انکشاف ہوا ہے، جس میں بعض سرکاری افسران اور بڑے پٹرول پمپس کے ملوث ہونے کے… pic.twitter.com/u9PjUZuSvE
— Faisal Abbas Khar (@FaisalAbbasKhar) May 11, 2026

بتایا گیا ہے کہ ملزم کے خلاف اسلام آباد کے مختلف تھانوں میں متعدد ایف آئی آرز درج کی جا چکی ہیں، کیس کی تحقیقات کے دوران 20 سے زائد مشکوک کمپنیوں کا سراغ ملا ہے جو اس نیٹ ورک کو چلانے کے لیے استعمال کی جا رہی تھیں، 18 ویں گریڈ کے کئی افسران پر الزام ہے کہ انہوں نے اپنے اختیارات کا ناجائز استعمال کرتے ہوئے اس نیٹ ورک کو تحفظ فراہم کیا، اسکینڈل کی گہرائی کا اندازہ اس بات سے لگایا جا سکتا ہے کہ رقم صرف ملک کے اندر نہیں رہی تحقیقاتی اداروں کو شواہد ملے ہیں کہ لوٹی گئی رقوم سعودی عرب اور سپین منتقل کی گئی۔

یہ بھی بتایا جارہا ہے کہ نیٹ ورک میں شامل افراد کی جانب سے بڑے پیمانے پر مشکوک پراپرٹی ٹرانسفرز کے ریکارڈ بھی قبضے میں لے لیے گئے ہیں، قانون نافذ کرنے والے ادارے منی لانڈرنگ اور بڑے پیمانے پر ہونے والے اس فراڈ کی تحقیقات کر رہے ہیں، متاثرین کی ایک بڑی تعداد انصاف کے لیے حکام سے رجوع کر رہی ہے، جبکہ ملوث افسران اور دیگر کرداروں کے گرد گھیرا تنگ کیا جا رہا ہے۔