چین بنگلہ دیش کے ساتھ جامع اسٹریٹجک تعاون پر مبنی شراکت داری کو مزید فروغ دینے کے لیے تیار

منگل 5 مئی 2026 21:57

بیجنگ(اُردو پوائنٹ اخبارتازہ ترین - این این آئی۔ 05 مئی2026ء) چین نے کہا ہے کہ وہ بنگلہ دیش کے ساتھ جامع اسٹریٹجک تعاون پر مبنی شراکت داری کی ترقی کو مزید فروغ دینے کے لیے تیار ہے۔عرب ٹی وی کے مطابق چینی وزارت خارجہ کے ترجمان نے بنگلہ دیشی وزیر خارجہ خلیل الرحمن کے دورہ چین کے حوالے سے ایک سوال کے جواب میں کہا کہ چین اور بنگلہ دیش روایتی دوست ہمسایہ اور جامع تزویراتی شراکت دار ہیں۔

سفارتی تعلقات کے قیام کے 50 سال سے زائد عرصے سے دونوں ممالک نے پرامن بقائے باہمی کے پانچ اصولوں کی بنیاد پر ایک دوسرے کا احترام کرتے ہوئے اور ایک دوسرے کے ساتھ مساوی سلوک کرتے ہوئے مسلسل دوستانہ تعلقات استوار کیے ہیں۔ دوطرفہ تعلقات مستحکم اور مسلسل ترقی کو برقرار رکھے ہوئے ہیں، جس سے دونوں ممالک کے عوام کو ٹھوس فوائد حاصل ہوئے ہیں۔

(جاری ہے)

ترجمان نے کہا کہ چین ،چین بنگلہ دیش تعلقات کو بہت اہمیت دیتا ہے اور اس دورے سے فائدہ اٹھاتے ہوئے بنگلہ دیش کی نئی حکومت کے ساتھ سیاسی باہمی اعتماد کو بڑھانے، مختلف شعبوں میں تبادلوں اور تعاون کو گہرا کرنے، بیلٹ اینڈ روڈ انیشیٹو کی اعلی معیار کی مشترکہ طور پر تعمیر کرنے اور چین-بنگلہ دیش جامع اسٹریٹجک تعاون پر مبنی شراکت داری کی ترقی کو مزید فروغ دینے کے لیے تیار ہے۔