Live Updates

متحدہ عرب امارات پر مسلسل دوسرے روز میزائلوں اور ڈرون سے حملہ

فضائی دفاعی نظام اس وقت میزائل اور ڈرون حملوں سے نمٹ رہا ہے، مختلف علاقوں میں سنائی دینے والی زور دار دھماکوں کی آوازیں بھی اسی کا نتیجہ ہے، اماراتی حکام

محمد علی منگل 5 مئی 2026 19:39

ابوظہبی (اُردو پوائنٹ اخبارتازہ ترین۔ 05 مئی2026ء) متحدہ عرب امارات پر مسلسل دوسرے روز میزائلوں اور ڈرون سے حملہ۔ تفصیلات کے مطابق متحدہ عرب امارات پر منگل کے روز بھی مبینہ طور پر میزائلوں اور ڈرونز سے حملوں کی کوشش کی گئی۔ خلیج ٹائمز کے مطابق اماراتی حکام نے بتایا ہے کہ امارات کا فضائی دفاعی نظام اس وقت میزائل اور ڈرون حملوں سے نمٹ رہا ہے، مختلف علاقوں میں سنائی دینے والی زور دار دھماکوں کی آوازیں بھی اسی کا نتیجہ ہے۔

اس سے متحدہ عرب امارات پر گزشتہ روز کے میزائل اور ڈرون حملوں کے بعد ایران کا موقف سامنے آیا تھا۔ ایرانی سرکاری میڈیا نے متحدہ عرب امارات پر ڈرون اور میزائل حملوں کی تردید کرتے ہوئے کہا کہ ایران کی جانب سے متحدہ عرب امارات کو نشانہ بنانے کا کوئی ارادہ نہیں تھا۔

(جاری ہے)

جبکہ متحدہ عرب امارات نے الزام عائد کیا کہ ایران نے ایک مرتبہ پھر امارات پر میزائل فائر کیے ہیں۔

اماراتی حکام کے مطابق ایران کی جانب سے فائر کیے گئے 3 کروز میزائل فضائی دفاعی نظام نے تباہ کر دیے، جبکہ ایک میزائل سمندر میں جا گرا۔ متحدہ عرب امارات میں سنائی دینے والی آوازیں فضائی خطرے کو کامیابی سے ختم کرنے کی وجہ سے پیدا ہوئیں۔ متعلقہ حکام نے بتایا ہے کہ متحدہ عرب امارات کا فضائی دفاعی نظام میزائلوں اور ڈرون خطرات کا سرگرمی سے مقابلہ کر رہا ہے۔

وزارتِ دفاع کا کہنا ہے کہ ملک بھر میں سنائی دینے والی آوازیں جاری میزائل اور ڈرون کارروائیوں کا نتیجہ ہیں۔ حکام نے عوام پر زور دیا ہے کہ وہ معلومات کے لیے صرف سرکاری ذرائع پر بھروسہ کریں، افواہیں پھیلانے سے گریز کریں، اور الرٹ کی صورتحال میں عوامی تحفظ کی تمام ہدایات پر عمل کریں۔ یہ بیان بڑھتی ہوئی علاقائی کشیدگی کے درمیان سامنے آیا ہے، اور حکام نے اس بات پر زور دیا ہے کہ یو اے ای کا فضائی دفاعی نظام مکمل طور پر فعال ہے اور ممکنہ خطرات کا جواب دینے کی صلاحیت رکھتا ہے۔

یو اے ای کے رہائشیوں کو پیر کی سہ پہر ممکنہ میزائل خطرات کے بارے میں متعدد ہنگامی الرٹس موصول ہوئے۔ جنگ بندی کے نافذ ہونے کے تقریباً ایک ماہ بعد یہ اس طرح کے پہلے الرٹس تھے۔ جہاں ایک جانب مبینہ میزائل حملوں کی اطلاعات سامنے آئیں، وہیں خلیج ٹائمز کے مطابق فجیرہ کے حکام نے فجیرہ پیٹرولیم انڈسٹریز زون میں آگ لگنے کی تصدیق کی، جسے ان کے بقول ایران کی جانب سے کیے گئے ڈرون حملے کا نتیجہ قرار دیا گیا۔