یونائیٹڈ ایئرلائنز کے طیارے کے بجلی کے پول اور ٹرک سے ٹکرانے کی نئی ویڈیو سامنے آگئی

نیویارک(اردوپوائنٹ اخبارتازہ ترین۔05 مئی ۔2026 ) یونائیٹڈ ایئرلائنز کے طیارے کے بجلی کے پول اور ٹرک سے ٹکرانے کی نئی ویڈیو سامنے آگئی، امریکہ میں نیو جرسی کے نیوآرک ایئرپورٹ پر پیش آئے واقعے کے دوران یونائیٹڈ ایئرلائنز کا بوئنگ 767 مسافر طیارہ خوفناک حادثے سے بال بال بچ گیا تھا۔ تفصیلات کے مطابق امریکہ میں نیو جرسی کے نیوارک لبرٹی انٹرنیشنل ایئرپورٹ پر لینڈنگ کے دوران یونائیٹڈ ایئرلائنز کے ایک طیارے کے بجلی کے پول اور ایک ٹرک سے ٹکرانے کی نئی ویڈیو سامنے آئی ہے۔

ایئر ٹریفک کنٹرولرز کا کہنا ہے کہ اس واقعے کے بعد طیارے کے پہلو میں سوراخ ہو گیا اور ٹائر کو بھی نقصان پہنچا۔ بوئنگ 767 طیارہ بجلی کے پول اور ٹرک سےٹکرانے کے وقت تقریباً 160 میل فی گھنٹہ کی رفتار سے سفر کر رہا تھا۔

(جاری ہے)

تاہم اس غیر معمولی حادثے میں طیارہ بحفاظت لینڈ کر گیا اور تمام مسافر محفوظ رہے، حکام نے واقعے کی اعلی سطح پر تحقیقات شروع کر دیں۔

امریکی نشریاتی ادارے کے مطابق مسافر طیارہ لینڈنگ کے دوران حادثے کا شکار ہوا یہ واقعہ اس وقت پیش آیا جب فلائٹ نمبر 169 وینس، اٹلی سے نیوارک لبرٹی انٹرنیشنل ایئرپورٹ پہنچ رہی تھی طیارہ جب اپنی منزل کے قریب تھا تو اس کا نچلا حصہ اور ٹائر نیو جرسی ٹرن پائیک نامی شاہراہ پر موجود ایک بجلی کے کھمبے اور ٹریلر سے ٹکرا گئے۔ فیڈرل ایوی ایشن انتظامیہ نے اس حوالے سے تصدیق کی ہے کہ یہ طیارہ بوئنگ 767-400 ماڈل کا تھا اور ٹکر کے باوجود پائلٹ اسے رن وے پر بحفاظت اتارنے میں کامیاب رہا خوش قسمتی سے طیارے میں سوار کسی بھی مسافر یا عملے کے رکن کو کوئی چوٹ نہیں آئی، البتہ طیارے کو معمولی نقصان پہنچا۔

یونائیٹڈ ایئر لائنز کے ترجمان کا کہنا ہے کہ ان کی تکنیکی ٹیم جہاز کو پہنچنے والے نقصان کا جائزہ لے رہی ہے اور حفاظتی پروٹوکول کے تحت متعلقہ پرواز کے عملے کو فی الحال ڈیوٹی سے ہٹا دیا گیا ہے تاکہ واقعے کی شفاف تحقیقات کی جا سکیں۔ اس حادثے کے نتیجے میں ٹریلر کا ڈرائیور معمولی زخمی ہوا جسے فوری طور پر ہسپتال منتقل کیا گیا، تاہم ابتدائی طبی امداد کے بعد اسے فارغ کر دیا گیا۔

پولیس کے مطابق جہاز سے ٹکرانے والا بجلی کا کھمبا وہاں سے گزرنے والی ایک جیپ پر بھی گرا جس سے گاڑی کو نقصان پہنچا۔ واقعے کے بعد نیشنل ٹرانسپورٹیشن سیفٹی بورڈ اور وفاقی حکام نے اس معاملے کی باقاعدہ تحقیقات کا آغاز کر دیا ہے، تحقیقاتی ادارے کے اہلکار نیوآرک پہنچی گے ہیں تاکہ جائے وقوعہ کا معائنہ کیا جا سکے اس سلسلے میں یونائیٹڈ ایئر لائنز کو ہدایت جاری کی گئی ہے کہ وہ طیارے کا کاک پٹ وائس ریکارڈر اور فلائٹ ڈیٹا ریکارڈر حکام کے حوالے کرے تاکہ حادثے کی اصل وجوہات کا تعین کیا جا سکے۔