علامہ اقبال ٹیچنگ ہسپتال ڈیرہ غازی خان میں ٹیومر اور ریڑھ کی ہڈی کے آپریشنز کے حوالے سے تربیت کا سلسلہ جاری

بدھ 6 مئی 2026 19:37

ڈیرہ غازی خان (اُردو پوائنٹ اخبارتازہ ترین - اے پی پی۔ 06 مئی2026ء) علامہ اقبال ٹیچنگ ہسپتال ڈیرہ غازی خان، جنوبی پنجاب کی پہلی جدید نیورو سرجری سکل لیب میں پوسٹ گریجویٹ ٹرینیز کو دماغ، برین ٹیومر اور ریڑھ کی ہڈی کے آپریشنز کے حوالے سے تربیت کا سلسلہ جاری ہے۔اس موقع پر ایسوسی ایٹ پروفیسر ڈاکٹر عطاالرحمن بزدار نے بتایا کہ اس لیب میں پیچیدہ آپریشنز کے لیے عملی تربیت فراہم کی جاتی ہے۔

ٹرینیز سمیولیشن اور تھری ڈی پرنٹڈ ماڈلز کے ذریعے ریڑھ کی ہڈی کی پیچیدہ سرجریوں کی منصوبہ بندی اور مشق کرتے ہیں۔انہوں نے مزید بتایا کہ نیورو سرجری کے ریذیڈنٹس کو دماغی رسولیوں (برین ٹیومر) کے آپریشنز کی منصوبہ بندی، دماغی بافتوں کی نقل اور ٹیومر کو محفوظ انداز میں نکالنے کی تربیت دی جا رہی ہے۔

(جاری ہے)

انہوں نے کہا کہ یہ لیبارٹری ریذیڈنٹس کو مریضوں پر حقیقی آپریشن سے پہلے ایک محفوظ اور کنٹرول شدہ ماحول میں مشق کا موقع فراہم کرتی ہے۔

ورکشاپس میں مائیکروسکوپ اور دیگر جدید آلات کے ساتھ ہینڈز آن ٹریننگ بھی شامل ہے۔اس موقع پر ایم ایس علامہ اقبال ٹیچنگ ہسپتال ڈاکٹر منصور احمد افغان نے کہا ہے کہ ٹرینیز کو جدید نیورو سرجری کے تقاضوں سے ہم آہنگ کرنے کے لیے یہ تربیتی لیب نہ صرف ڈیرہ غازی خان بلکہ گردونواح کے علاقوں کے رہائشیوں کے لیے بھی ایک بڑی سہولت ثابت ہوگی۔