پنجاب کے 15 ای خدمت مراکز سے 1 کروڑ 5 لاکھ سے زائد شہری مستفید ہوئے، فیصل یوسف

بدھ 6 مئی 2026 19:37

لاہور (اُردو پوائنٹ اخبارتازہ ترین - اے پی پی۔ 06 مئی2026ء) پنجاب بھر میں شہریوں کو انتظار اور طویل قطاروں سے نجات دلانے اور ایک ہی چھت تلے ضلعی، صوبائی اور وفاقی سطح کی سرکاری خدمات کی فراہمی کیلئے قائم 15 ای خدمت مراکز سے اب تک 1 کروڑ 5 لاکھ سے زائد شہری مختلف سرکاری خدمات سے مستفید ہو چکے ہیں۔ یہ بات پی آئی ٹی بی چیئرمین فیصل یوسف کی زیرِصدارت ارفع ٹاور میں منعقدہ جائزہ اجلاس میں بتائی گئی۔

اجلاس میں بتایا گیا کہ ای خدمت مراکز کے ذریعے اب تک 18 لاکھ 16 ہزار سے زائد شہریوں نے پوسٹ آفس، 13 لاکھ 28 ہزار سے زائد نے ڈومیسائل سرٹیفکیٹ، 12 لاکھ 20 ہزار سے زائد نے ڈرائیونگ لائسنس، 11 لاکھ 77 ہزار سے زائد نے نادرا ای سہولت، 10 لاکھ سے زائد شہریوں نے قومی شناختی کارڈ کی سہولت حاصل کی۔

(جاری ہے)

مزید بتایا گیا کہ ای خدمت مراکز میں شہریوں کو کریکٹر، پیدائش، وفات، نکاح و طلاق کے سرٹیفکیٹس، ڈومیسائل، لرنر و ریگولر ڈرائیونگ لائسنس، گاڑیوں کی رجسٹریشن، ٹوکن ٹیکس کی ادائیگی، شناختی کارڈ کا اجرا، نادرا ای سہولت، ڈاکخانہ، گاڑیوں کی ملکیت کی منتقلی، اراضی فرد، روٹ پرمٹ، ای سٹامپ پیپر اور اسلحہ لائسنس سمیت 170 سے زائد سرکاری خدمات ایک چھت تلے فراہم کی جا رہی ہیں۔

اس حوالے سے پی آئی ٹی بی چیئرمین فیصل یوسف کا کہنا تھا کہ ای خدمت مراکز میں سرکاری خدمات کے حصول میں اضافہ عوامی اعتماد کا منہ بولتا ثبوت ہے اور حالیہ ای خدمت مراکز نے عوامی خدمات کی معیاری اور موثر فراہمی کے میدان میں نمایاں کامیابی حاصل کرتے ہوئے ISO 9001:2015 سرٹیفکیشن بھی حاصل کر لیا ہے۔ انہوں نے مزید کہا کہ ہم ان مراکز کے دائرہ کار کو بڑھانے اور انہیں مزید موثر بنانے کیلئے مسلسل اقدامات کر رہے ہیں۔