پاکستان مرکزی مسلم لیگ کے زیر اہتمام معرکہ حق کی کامیابی کا ایک سال مکمل ہونے پر آل پارٹیز کانفرنس کا انعقاد

جمعرات 7 مئی 2026 19:49

لاہور (اُردو پوائنٹ اخبارتازہ ترین - اے پی پی۔ 07 مئی2026ء) پاکستان مرکزی مسلم لیگ کے زیر اہتمام معرکہ حق کی کامیابی کا ایک سال مکمل ہونے پر جمعرات کے روز یہاں آل پارٹیز کانفرنس کا انعقاد کیا گیا، جس میں مرکزی صدر خالد مسعود سندھو، نائب صدر حافظ طلحہ سعید ،جنرل سیکرٹری سیف اللہ قصوری، قاری محمد یعقوب شیخ، حافظ عبدالغفار روپڑی، جاوید احمد قصوری، قاسم ضیا، پیر میاں جلیل شرقپوری، علامہ ناصر مدنی، ڈاکٹر عبدالغفور راشد، خالد نیک گجر، ڈاکٹر مزمل ہاشمی ، ڈاکٹر فرید احمد پراچہ، حافظ عبد الرف، انجینئر عادل خلیق، حمید الحسن گجر، سمیت مختلف مذہبی، سیاسی، قائدین نے بڑی تعداد میں شرکت کی۔

کانفرنس کے شرکا نے افواجِ پاکستان کی دفاعی کامیابیوں، دشمن کے غرور کو خاک میں ملانے، ملکی سلامتی کے تحفظ اور فیلڈ مارشل سید عاصم منیر کی قیادت کو بھرپور انداز میں خراجِ تحسین پیش کیا۔

(جاری ہے)

اس موقع پرمرکزی صدر خالد مسعود سندھو نے خطاب کرتے ہوئے کہا کہ معرکہ حق کی کامیابی نے قومی دفاع کو نئی قوت بخشی اور یہ دن قومی وقار، عسکری برتری اور اتحاد کی علامت کے طور پر یاد رکھا جائے گا۔

جنرل سیکرٹری سیف اللہ قصوری نے اپنے خطاب میں کہا کہ جب بھی ملک پر مشکل وقت آیا، افواج پاکستان نے بڑھ چڑھ کر کردار ادا کیا، آج علما مشائخ پوری قوت کے ساتھ افواجِ پاکستان کے شانہ بشانہ کھڑے ہیں۔علامہ ناصر مدنی نے کہا کہ پاکستان مرکزی مسلم لیگ نے تمام علما اور سیاسی لوگوں کو اکٹھا کرکے بنیان مرصوص کا عملی مظاہرہ پیش کیا ہے، میں فیلڈ مارشل سید عاصم منیر کو خراج تحسین کرتا ہوں۔

اے پی سی میں قاری شیخ محمد یعقوب ،جماعت اسلامی وسطی جاوید احمد قصوری سمیت دیگر قائدین نے کہا کہ علما ملکی دفاع، استحکام اور ترقی کے لیے اپنا بھرپور کردار ادا کرتے رہیں گے جبکہ افواجِ پاکستان کی قربانیاں پوری قوم کے لیے باعثِ فخر ہیں۔مقررین نے کہا کہ پاکستان نے اپنے سے کئی گنا بڑے دشمن کو شکست دے کر ثابت کیا کہ قومی اتحاد، مضبوط قیادت اور بہادر افواج وطن کے دفاع کو ناقابلِ تسخیر بناتے ہیں۔کانفرنس کے اختتام پرشرکا نے اس عزم کا اعادہ کیا کہ نظریہ پاکستان، قومی سلامتی، دفاع وطن اور استحکام پاکستان کے لیے ہر سطح پر متحد ہو کر کردار ادا کیا جائے گا ۔