عدالت نے لڑکی کو ہراساں کرنے کے مقدمے میں ملزم کی درخواست ضمانت مسترد کردی

ابتدائی تکنیکی تجزیے میں قابلِ اعتراض مواد کی موجودگی سامنے آئی،ملزم کی رہائی سے مدعیہ کو مزید خطرات لاحق ہو سکتے ہیں،ایف آئی اے

جمعہ 8 مئی 2026 16:11

عدالت نے لڑکی کو ہراساں کرنے کے مقدمے میں ملزم کی درخواست ضمانت مسترد ..

کراچی (اُردو پوائنٹ اخبارتازہ ترین - این این آئی۔ 08 مئی2026ء) جوڈیشل مجسٹریٹ غربی کی عدالت کے روبرو لڑکی کی نازیبا ویڈیوز ریکارڈ کرکے ہراساں کرنے کے مقدمے میں درخواست ضمانت پر فیصلہ سنادیا۔ عدالت نے ملزم کی درخواستِ ضمانت مسترد کردی۔ عدالت نے کہا کہ ڈیجیٹل پلیٹ فارمز کا غلط استعمال خواتین کے لیے خطرناک رجحان بن چکا ہے۔ خواتین کیخلاف آن لائن جرائم معاشرتی خوف کو جنم دیتے ہیں۔

ایسے جرائم میں قانون خاموش تماشائی نہیں بن سکتا۔ سنگین نوعیت کے الزامات کے باعث ملزم کو رعایت نہیں دی جاسکتی۔

(جاری ہے)

مقدمے میں کہا گیا کہ ملزم نے منگنی کے دوران اعتماد حاصل کر کے قریبی تعلقات قائم کیئے۔ ملزم نے مبینہ طور پر مدعیہ کو نشہ آور چیز پلا کر بے ہوش کیا اور نازیبا ویڈیوز بنائی۔ ملزم کی پہلے سے شادی شدہ ہونے کی اطلاع ملنے پر منگنی ختم ہوئی۔

وکیل صفائی نے موقف دیا کہ مقدمہ ذاتی رنجش کا نتیجہ ہے۔ دفاع کے مطابق منگنی ٹوٹنے کے بعد انتقامی کارروائی کے طور پر مقدمہ درج کرایا گیا۔ ایف آئی اے کے مطابق تفتیش کے دوران ملزم کے قبضے سے موبائل فون برآمد کیا گیا۔ ابتدائی تکنیکی تجزیے میں قابلِ اعتراض مواد کی موجودگی سامنے آئی۔ملزم کی رہائی سے مدعیہ کو مزید خطرات لاحق ہو سکتے ہیں۔