راولپنڈی میں کرکٹ ٹیلنٹ کو میرٹ اور بہتر سہولیات کی فراہمی کے ذریعے قومی سطح پر متعارف کرایا جائے گا ،نوید مشتاق عباسی

منگل 12 مئی 2026 11:56

راولپنڈی (اُردو پوائنٹ اخبارتازہ ترین - اے پی پی۔ 12 مئی2026ء) نو منتخب صدر ڈسٹرکٹ کرکٹ ایسوسی ایشن (ڈی سی اے)نوید مشتاق عباسی نے کہا ہے کہ راولپنڈی میں کرکٹ کے بے پناہ ٹیلنٹ کو میرٹ اور بہتر سہولیات کی فراہمی کے ذریعے قومی سطح پر متعارف کرایا جائے گا جبکہ نو منتخب سیکرٹری ذوالفقار علی کا کہنا ہے کہ ڈی سی اے راولپنڈی کو فعال اور مضبوط ادارہ بنانے کے لیے تمام اسٹیک ہولڈرز کو ساتھ لے کر چلیں گے۔

اے پی پی سے خصوصی گفتگو کرتے ہوئے نوید مشتاق عباسی نے کہا کہ ان کی اولین ترجیح راولپنڈی میں گراس روٹ لیول پر کرکٹ کے فروغ، نوجوان کھلاڑیوں کو زیادہ مواقع دینے اور شفاف نظام کے قیام پر ہو گی۔ انہوں نے کہا کہ کلبوں نے جس اعتماد کا اظہار کیا ہے اس پر پورا اترنے کی بھرپور کوشش کریں گے۔

(جاری ہے)

نو منتخب سیکرٹری ذوالفقار علی نے کہا کہ راولپنڈی کرکٹ کی بہتری کے لیے تمام عہدیدار متحد ہو کر کام کریں گے، ڈی سی اے کے معاملات کو بہتر انداز میں چلانے اور کھلاڑیوں کو سہولیات فراہم کرنے کے لیے جامع حکمت عملی اختیار کی جائے گی تاکہ راولپنڈی کا کرکٹ ٹیلنٹ مزید ابھر کر سامنے آ سکے۔

انہوں نے کہا کہ انتخابات خوش اسلوبی سے مکمل ہوئے اور تمام امیدواروں نے جمہوری عمل میں بھرپور حصہ لیا جو راولپنڈی کرکٹ کے لیے مثبت روایت ہے۔ نو منتخب خزانچی آصف باجوہ نے کہا کہ ڈی سی اے کے مالی معاملات میں شفافیت کو یقینی بنایا جائے گا اور کرکٹ کی ترقی کے لیے دستیاب وسائل کو مؤثر انداز میں استعمال کیا جائے گا۔ واضح رہے کہ ڈی سی اے راولپنڈی کے انتخابات پنڈی اسٹیڈیم میں منعقد ہوئے جہاں مختلف نشستوں پر امیدواروں کے درمیان کانٹے دار مقابلہ دیکھنے میں آیا۔ صبیح اظہر گروپ نے مسعود انور اور اشرف قریشی گروپ کو شکست دی۔