جونیئرہاکی کھلاڑیوں کے لیے اینٹی ڈوپنگ آگاہی لیکچر کا انعقاد

منگل 12 مئی 2026 14:49

لاہور (اُردو پوائنٹ اخبارتازہ ترین - اے پی پی۔ 12 مئی2026ء) پاکستان ہاکی فیڈریشن کے زیر اہتمام اسلام آباد میں جاری انڈر 18 ٹریننگ کیمپ کے دوران اینٹی ڈوپنگ (واڈا)کے قوانین سے متعلق ایک اہم آگاہی سیشن منعقد کیا گیا۔ یہ کیمپ جاپان میں شیڈول انڈر 18 ایشیا کپ کی تیاریوں کے سلسلے میں لگایا گیا ہے۔اس موقع پر واڈا کے سی ای او ڈاکٹر سہیل سلیم نے کیمپ میں شریک کھلاڑیوں اور آفیشلز کو ممنوعہ ادویات کے استعمال کے نقصانات اور عالمی سطح پر واڈا کے وضع کردہ قوانین کے بارے میں تفصیلی بریفنگ دی۔

(جاری ہے)

لیکچر کے دوران کھلاڑیوں کو بتایا گیا کہ بین الاقوامی مقابلوں میں ڈوپنگ ٹیسٹ کے طریقہ کار کیا ہوتے ہیں اور نادانستہ طور پر ممنوعہ اجزا والی ادویات کے استعمال سے کس طرح بچا جا سکتا ہے۔حکام کا کہنا تھا کہ جدید ہاکی میں کھلاڑیوں کا نظم و ضبط اور طبی اصولوں کی پابندی ناگزیر ہے تاکہ وہ کسی بھی غیر قانونی عمل سے بچ کر ملک کا نام روشن کر سکیں۔ پاکستان ہاکی فیڈریشن کے میڈیا سیل کے مطابق اس طرح کے معلوماتی سیشنز کا مقصد نوجوان کھلاڑیوں کو پیشہ ورانہ معیار کے مطابق تیار کرنا ہے تاکہ وہ ایشیا کپ جیسے اہم ایونٹ میں مکمل اعتماد کے ساتھ میدان میں اتر سکیں۔