سونارو پاڑے کے رہائشی کاظم علی میر جت انصاف کے حصول کے لیے ٹنڈوالہیار پریس کلب پہنچ گئے

جمعرات 14 مئی 2026 22:26

ٹنڈوالہیار(اُردو پوائنٹ اخبارتازہ ترین - این این آئی۔ 14 مئی2026ء) سونارو پاڑے کے رہائشی کاظم علی میر جت انصاف کے حصول کے لیے ٹنڈوالہیار پریس کلب پہنچ گئے۔ انہوں نے الزام عائد کیا ہے کہ ان کے قریبی رشتہ دار انہیں جھوٹے مقدمات میں پھنسانے، پلاٹ پر قبضہ کرنے اور جان و مال کو نقصان پہنچانے کی دھمکیاں دے رہے ہیں۔پریس کانفرنس کے دوران کاظم علی میر جت نے کہا کہ ان کے بھتیجے علی عباس، اس کے ماموں امتیاز (جو پولیس اہلکار ہیں) اور اشفاق احمد انہیں مسلسل ہراساں کر رہے ہیں اور پلاٹ پر ناجائز قبضے کی کوشش کی جا رہی ہے۔

انہوں نے بتایا کہ ان کے والد کی ملکیت میں پانچ ہزار فٹ کا ایک پلاٹ شامل ہے، جس میں چار بھائی شریک تھے، تاہم ایک بھائی والد کی زندگی میں ہی وفات پا گیا تھا اور اس کی کوئی اولاد نہیں ہے، جبکہ دوسرے بھائی کو والد نے اپنی زندگی میں کوئی حصہ نہیں دیا تھا۔

(جاری ہے)

اس کے باوجود بعض افراد جعلی دعوے کر کے پلاٹ پر قبضہ کرنے کی کوشش کر رہے ہیں۔کاظم علی میر جت نے مزید کہا کہ وہ شہر میں مویشیوں کے باڑے کے مالک ہیں اور مخالفین انہیں دھمکیاں دے رہے ہیں کہ وہ پولیس اور جرائم پیشہ افراد کے ساتھ مل کر باڑے پر قبضہ کریں گے اور دو کروڑ روپے سے زائد مالیت کے مویشی بھی لے جائیں گے۔

انہوں نے بتایا کہ ان کے خلاف عدالت میں بھی درخواست دائر کی گئی تھی تاہم عدالت نے قانونی شواہد کی بنیاد پر فیصلہ ان کے حق میں دیا، اس کے باوجود انہیں مسلسل ہراساں کیا جا رہا ہے۔انہوں نے آئی جی سندھ، ڈی آئی جی حیدرآباد اور ایس ایس پی ٹنڈوالہیار سے مطالبہ کیا کہ انہیں تحفظ فراہم کیا جائے اور دھمکیاں دینے والے عناصر کے خلاف فوری قانونی کارروائی کی جائے تاکہ انہیں انصاف مل سکے۔