کوئٹہ میں شام ڈھلتے ہی فحاشی و عریانی پھیلانے والے عناصر اور منشیات فروش گروہ متحرک ہوجاتے ہیں،مولانا عبدالرحمن رفیق

جمعرات 14 مئی 2026 19:35

کوئٹہ (اُردو پوائنٹ اخبارتازہ ترین - این این آئی۔ 14 مئی2026ء) جمعیت علماء اسلام ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سینیئر نائب امیر مولانا خورشید احمد، حاجی بشیر احمد کاکڑ، مولانا محب اللہ، مولانا محمد ایوب ایوبی، شیخ مولانا عبدالاحد، مولانا سعید احمد، حافظ سراج الدین، مفتی محمد روزی خان بادیزئی، مولانا محمد شعیب جدون، رحیم الدین ایڈووکیٹ اور مولانا محمد عارف شمشیر نے کہا ہے کہ شہرِ کوئٹہ میں شام ڈھلتے ہی فحاشی و عریانی پھیلانے والے عناصر اور منشیات فروش گروہ متحرک ہوجاتے ہیں جو نہ صرف معاشرتی اقدار کے لیے سنگین خطرہ ہیں بلکہ نوجوان نسل کے مستقبل کو بھی تباہی کی طرف دھکیل رہے ہیں۔

انہوں نے کہا کہ شہر کے متعدد چوک چوراہوں اور اہم شاہراہوں پر فحاشی پھیلانے والے عناصر کھلے عام گھومتے دکھائی دیتے ہیں۔

(جاری ہے)

سٹی نالہ اور گرد و نواح کے علاقوں میں نشئی افراد کی سرِعام منشیات نوشی انتظامیہ کی کارکردگی پر سوالیہ نشان ہے۔ مین شاہراہوں پر اس قسم کے مناظر بچوں اور طلبہ کے اخلاق و کردار پر نہایت منفی اثرات مرتب کررہے ہیں جس سے نوجوان نسل کے اس ناسور کا شکار ہونے کے خدشات بڑھتے جارہے ہیں انہوں نے کہا کہ انتظامیہ کی غفلت، چشم پوشی اور بعض مقامات پر مبینہ رشوت خوری کے باعث یہ عناصر بے خوف ہوکر سرگرم ہیں جو انتہائی افسوسناک اور قابلِ مذمت امر ہے۔

انہوں نے ضلعی انتظامیہ اور قانون نافذ کرنے والے اداروں سے مطالبہ کیا کہ فحاشی و عریانی اور منشیات فروشی میں ملوث عناصر کے خلاف فوری، مؤثر اور بلاامتیاز کارروائی عمل میں لائی جائے تاکہ شہر کا ماحول محفوظ اور نوجوان نسل کو تباہی سے بچایا جاسکے۔