میئر سکھر کی جانب سے شدید گرمی کے باعث مزدوروں چھتریاں تقسیم کرنے کا سلسلہ شروع

جمعرات 11 جون 2026 20:52

سکھر (اُردو پوائنٹ اخبارتازہ ترین - اے پی پی۔ 11 جون2026ء) میئر سکھر بیرسٹر ارسلان اسلام شیخ نے کہاہے کہ شدید گرمی کی حالیہ لہر کے باعث سکھر میں درجہ حرارت 49 ڈگری سینٹی گریڈ تک پہنچ چکا ہے ۔ انہوں نے متعلقہ اداروں کو ہدایت دی ہے کہ عوامی سہولیات کی فراہمی کو ہر ممکن حد تک مؤثر اور بروقت یقینی بنایا جائے۔ بیرسٹر ارسلان اسلام شیخ کے مطابق شہر کے مختلف اہم مقامات پر ہیٹ ویو ریلیف کیمپس پہلے ہی قائم کیے جا چکے ہیں جبکہ مزید کیمپس کی تنصیب کا عمل بھی تیزی سے جاری ہے تاکہ زیادہ سے زیادہ شہری ان سہولیات سے مستفید ہو سکیں۔

انہوں نے بتایا کہ ان ریلیف کیمپس میں شہریوں کے لیے بنیادی اور فوری طبی و سہولتی انتظامات کیے گئے ہیں جن میں او آر ایس، ٹھنڈے مشروبات اور ٹھنڈا پانی شامل ہے تاکہ ہیٹ ویو کے اثرات کو کم کیا جا سکے۔

(جاری ہے)

میئر سکھر بیرسٹر ارسلان اسلام شیخ کی ہدایت پر سکھر میونسپل کارپوریشن کی جانب سے محنت کش طبقے کے لیے فری آف کاسٹ چھتریوں کی تقسیم کا عمل بھی جاری ہے تاکہ مزدور شدید دھوپ میں اپنے روزگار کے معمولات جاری رکھ سکیں۔

انہوں نے مزید کہا کے ابتدائی سروے میں تقریباً چار ہزار مزدوروں کی نشاندہی کی گئی ہے جنہیں مرحلہ وار چھتریاں فراہم کی جائیں گی، جبکہ ٹاؤن میونسپل چیئرمینز اور کونسلرز کو ہدایت دی گئی ہے کہ وہ اپنی یونین کونسلز میں مستحق افراد کی نشاندہی یقینی بنائیں تاکہ یہ سہولت شفاف انداز میں حقیقی حق داروں تک پہنچے۔ بیرسٹر ارسلان اسلام شیخ نے عوام سے اپیل کی ہے کہ وہ شجرکاری مہم میں بڑھ چڑھ کر حصہ لیں تاکہ سکھر کو سرسبز، صاف اور خوشگوار شہر بنایا جا سکے۔

اس موقع پر عالمی ادارۂ صحت سندھ کے سربراہ ڈاکٹر مختار حسین بھایو نے ہیٹ ویو ریلیف اقدامات کو بروقت اور مؤثر قرار دیتے ہوئے کہا کہ ایسے اقدامات شہری صحت کے تحفظ میں اہم کردار ادا کرتے ہیں ۔ میئر سکھر بیرسٹر ارسلان اسلام شیخ نے کہا کہ پاکستان پیپلز پارٹی کا وژن عوامی خدمت، ماحولیاتی تحفظ اور شہری بہتری پر مبنی ہے۔