طلاق کی افواہوں پر ڈاکٹر نبیہا علی خان کا دوٹوک مؤقف، جلد صلح کی امید ظاہر کر دی

منگل 16 جون 2026 18:29

لاہور (اُردو پوائنٹ اخبارتازہ ترین - آن لائن۔ 16 جون2026ء) معروف ماہرِ نفسیات، سوشل میڈیا شخصیت اور ٹی وی مبصر ڈاکٹر نبیہا علی خان نے شوہر حارث کھوکھر کی جانب سے طلاق کے نوٹس بھیجے جانے کی خبروں کو بے بنیاد قرار دیتے ہوئے کہا ہے کہ ان کے درمیان اختلافات ضرور ہیں، تاہم طلاق کا کوئی معاملہ زیر غور نہیں اور وہ جلد معاملات سلجھا لیں گے۔حال ہی میں ایک انٹرویو کے بعد سوشل میڈیا پر ڈاکٹر نبیہا علی خان اور حارث کھوکھر کی ازدواجی زندگی سے متعلق نئی بحث چھڑ گئی تھی۔

انٹرویو کے دوران جب ڈاکٹر نبیہا سے ان کی زندگی کی سب سے بڑی غلطی کے بارے میں سوال کیا گیا تو انہوں نے جواب دینے سے گریز کیا، جس پر میزبان نے ازراہِ مذاق ان کی شادی کا حوالہ دیا۔ اس موقع پر ڈاکٹر نبیہا کے ردِعمل نے سوشل میڈیا صارفین میں مختلف قیاس آرائیوں کو جنم دیا۔

(جاری ہے)

دوسری جانب حارث کھوکھر کے حالیہ بیانات اور انٹرویوز کے بعد دونوں کے درمیان طلاق کی افواہیں شدت اختیار کر گئی تھیں۔

بعض سوشل میڈیا صفحات اور یوٹیوب چینلز پر یہ دعویٰ بھی کیا گیا کہ حارث کھوکھر نے اپنی اہلیہ کو طلاق کا نوٹس بھجوا دیا ہے۔تاہم ڈاکٹر نبیہا علی خان نے اپنے یوٹیوب چینل پر جاری ایک تفصیلی بیان میں ان خبروں کی سختی سے تردید کرتے ہوئے کہا کہ انہوں نے کبھی اپنے شوہر کے خلاف کوئی بات نہیں کی۔ ان کا کہنا تھا کہ اختلافات کو سوشل میڈیا پر لانے کے بجائے باہمی گفتگو کے ذریعے حل کیا جانا چاہیے۔

ڈاکٹر نبیہا نے مزید کہا کہ وہ اپنے رشتے کو بچانے کے لیے پہلے بھی کئی بار پہل کر چکی ہیں، تاہم وہ ایسی بات پر معافی نہیں مانگ سکتیں جو انہوں نے کہی ہی نہیں۔ انہوں نے واضح کیا کہ طلاق کا کوئی نوٹس موصول نہیں ہوا اور انہیں امید ہے کہ دونوں جلد اپنے مسائل حل کر کے دوبارہ ایک ساتھ ہوں گے۔انہوں نے یوٹیوبرز اور سوشل میڈیا صارفین سے بھی اپیل کی کہ غیر مصدقہ خبروں اور گمراہ کن تھمب نیلز سے گریز کریں کیونکہ ایسی افواہیں افراد اور خاندانوں کی زندگیوں پر منفی اثرات مرتب کر سکتی ہیں۔