محرم میں شہریوں کے جان و مال کا تحفظ اولین ترجیح ہے،طلال چوہدری

جمعرات 25 جون 2026 13:26

اسلام آباد(اُردو پوائنٹ اخبارتازہ ترین - این این آئی۔ 25 جون2026ء) وزیر مملکت برائے داخلہ طلال چوہدری نے کہا ہے کہ محرم الحرام میں شہریوں کے جان و مال کا تحفظ حکومت کی اولین ذمہ داری ہے۔وزیر مملکت برائے داخلہ طلال چوہدری اور سیکرٹری داخلہ کی زیر صدارت اجلاس میں محرم الحرام کے سکیورٹی انتظامات کے حوالے سے اہم جائزہ لیا گیا ہے۔ اجلاس میں تمام صوبوں بشمول آزاد کشمیر اور گلگت بلتستان کے ہوم سیکرٹریز اور پولیس حکام نے شرکت کی۔

(جاری ہے)

اجلاس میں محرم الحرام کے جلوسوں اور مجالس کے سکیورٹی پلان پر تفصیلی بریفنگ دی گئی علاوہ ازیں انتظامات کا جامع جائزہ بھی لیا گیا، محرم الحرام کے دوران امن و امان کے قیام اور فول پروف سکیورٹی یقینی بنانے پر زور بھی دیا گیا۔طلال چوہدری نے وفاقی حکومت کی جانب سے صوبوں کو ہر ممکن تعاون کی یقین دہانی کراتے ہوئے درکار معاونت سے آگاہ کرنے اور ہوم سیکرٹریز اور قانون نافذ کرنے والے اداروں کو سکیورٹی اقدامات مزید مؤثر بنانے کی ہدایت کی۔