’’ اڑان پاکستان ‘‘ منصوبے کی کامیابیوں بارے آگاہ کیا جائے‘ پیاف

بدھ 1 جولائی 2026 16:58

لاہور(اُردو پوائنٹ اخبارتازہ ترین - این این آئی۔ 01 جولائی2026ء) پاکستان انڈسٹری اینڈ ٹریڈرز ایسوسی ایشن فرنٹ (پیاف)کے بانی میاں شفقت علی، چیئرمین سید محمود غزنوی،سینئر وائس چیئرمین خواجہ کاشف الہی ،وائس چیئرمین راجہ وسیم حسن اور چیئرمین ایسوسی ایٹ کلاس فرخ احسان خان نے اپنے مشترکہ بیان میں کہا ہے کہپاکستان کی معیشت کو درپیش چیلنجز سے نمٹنے اور اقتصادی استحکام کے لیے جامع اصلاحات کا عمل مزید تیز کرنے کی ضرورت ہے ،ٹیکس نظام میں بہتری، ٹیکس نیٹ کو وسعت دینے، غیر دستاویزی معیشت کو دستاویزی شکل دینے اور محصولات میں اضافے کے لیے اسٹیک ہولڈرز کی مشاورت سے غیر معمولی اقدامات اٹھانا ہوں گے۔

انہوںنے کہا کہ برآمدات میں اضافے، درآمدی انحصار میں کمی اور صنعتی پیداوار کے فروغ کے لیے نئی پالیسیوں پر کام کیا جائے۔

(جاری ہے)

توانائی کے شعبے میں گردشی قرضے میں کمی، بجلی کی ترسیل کے نظام کی بہتری اور خسارے میں چلنے والے سرکاری اداروں کی اصلاحات بھی ترجیحات ہونی چاہئیں۔ حکومت سرمایہ کاری کے فروغ، کاروباری ماحول کو بہتر بنانے اور نجی شعبے کی حوصلہ افزائی کے لیے اقدامات کرے تاکہ معیشت میں حصہ ڈالنے والے اسٹیک ہولڈرز بغیر کسی خوف و ہراس کھلے ذہن سے کاروبار کر سکیں ۔

انہوںنے کہا کہ مالیاتی نظم و ضبط، پالیسیوں میں تسلسل، شفاف حکمرانی اور موثر اصلاحات کے ذریعے پاکستان کی معیشت کو مضبوط بنیادوں پر استوار کیا جا سکتا ہے۔ اصلاحاتی عمل پر موثر عملدرآمد سے ملکی معیشت میں استحکام، سرمایہ کاری میں اضافہ اور روزگار کے نئے مواقع پیدا ہونے کی توقع ہے۔انہوں نے کہا کہ حکومت کی جانب سے ’’ اڑان پاکستان ‘‘ کا بہت چرچہ کیا گیا تھا اس پر عملدرآمد اور اس کی کامیابیوں کے حوالے سے بھی آگاہ کیا جائے ۔