پاکستان اور ترکیہ کے مابین غیر معمولی تعلقات کو مضبوط اقتصادی اور سرمایہ کاری شراکت داری میں تبدیل کرنے کی ضرورت ہے ،وزیراعظم

استنبول (اُردو پوائنٹ اخبارتازہ ترین - این این آئی۔ 04 جولائی2026ء) وزیر اعظم محمد شہباز شریف نے کہا ہے کہ پاکستان اور ترکیہ کے مابین غیر معمولی تعلقات کو مضبوط اقتصادی اور سرمایہ کاری شراکت داری میں تبدیل کرنے کی ضرورت ہے ،ترک کمپنیاں پاکستان میں توانائی، کان کنی و معدنیات، انفراسٹرکچر، میری ٹائم و لاجسٹکس، انفارمیشن ٹیکنالوجی، ٹیلی کمیونیکیشن، مینوفیکچرنگ، زراعت اور نجکاری سمیت مختلف ترجیحی شعبوں میں سرمایہ کاری کا دائرہ کار بڑھائیں ۔

وزیر اعظم آفس کے میڈیا ونگ کی طرف سے جاری بیان کے مطابق وزیراعظم محمد شہباز شریف کی ہفتہ کو استنبول میں ترکیہ کے سرکردہ کاروباری گروپوں اور صنعتی تنظیموں کے اعلیٰ عہدیداران نے الگ الگ ملاقاتیں کیں جن میں اقتصادی تعاون کو مضبوط بنانے اور معیشت کے کلیدی شعبوں میں ترکی کی مزید سرمایہ کاری کو راغب کرنے کے لیے پاکستان کے عزم کا اعادہ کیا گیا۔

(جاری ہے)

وزیراعظم سے چالک ہولڈنگ کے چیئرمین احمد چالک، البیرک گروپ کے بورڈ آف ڈائریکٹرز کے چیئرمین احمد البیرک اور یونین آف دی چیمبر اینڈ کموڈیٹی ایکسچینجز آف ترکیہ کے صدر رفعت حصارسیکیعلو نے ملاقاتیں کیں۔ ملاقاتوں کے دوران، وزیراعظم نے پاکستان اور ترکیہ کے درمیان گہرے برادرانہ تعلقات کو اجاگر کیا اور دونوں ممالک کے غیر معمولی تعلقات کو ایک مضبوط اقتصادی اور سرمایہ کاری شراکت داری میں تبدیل کرنے کی اہمیت پر زور دیا۔

انہوں نے پاکستان کے بہتر ہوتے ہوئے میکرو اکنامک بنیادی عوامل، سرمایہ کار دوست پالیسی فریم ورک اور شفاف، پیش گوئی کے قابل اور کاروبار دوست سرمایہ کاری کا ماحول یقینی بنانے کے حکومتی عزم کو نمایاں کیا۔ وزیراعظم نے ترک کمپنیوں کو پاکستان کے ترجیحی شعبوں بشمول توانائی، کان کنی و معدنیات، انفراسٹرکچر، میری ٹائم (بحری امور)و لاجسٹکس، انفارمیشن ٹیکنالوجی، ٹیلی کمیونیکیشن، مینوفیکچرنگ، زراعت اور نجکاری میں اپنی سرمایہ کاری کا دائرہ کار بڑھانے کی دعوت دی۔

انہوں نے کہا کہ خصوصی سرمایہ کاری سہولت کونسل، متعلقہ وفاقی اور صوبائی حکام کے ساتھ قریبی تعاون کیساتھ کام کرتے ہوئے، سٹریٹجک سرمایہ کاروں کوون ونڈو سہولت اور ادارہ جاتی معاونت فراہم کر رہی ہے۔ چالک ہولڈنگ کے ساتھ ملاقات میں وزیراعظم نے توانائی، انفراسٹرکچر، انفارمیشن ٹیکنالوجی اور نجکاری کے شعبوں میں پاکستان میں موجود اہم مواقع پر زور دیا۔

انہوں نے پاکستان میں اپنے آپریشنز کو وسعت دینے میں کمپنی کی دلچسپی کا خیرمقدم کرتے ہوئے کہا کہ چالک انرجی اور گیپ انشات کے ذریعے کمپنی کی موجودہ موجودگی گہرے تعاون کے لیے ایک مضبوط بنیاد فراہم کرتی ہے۔ وزیراعظم نے پاکستان میں البیرک گروپ کی دیرینہ سرگرمیوں کو سراہا اور پاکستان کی مواصلاتی رابطوں اور بنیادی ڈھانچے کی ترقی میں کمپنی کے اہم کردار کا اعتراف کرتے ہوئے انہیں بحری انفراسٹرکچر، بندرگاہوں کی جدید کاری اور لاجسٹکس کے شعبوں میں اپنی سرمایہ کاری مزید بڑھانے کی ترغیب دی۔

وزیراعظم نے پاکستان میں البیراک گروپ کی دیرینہ مصروفیات کو بھی سراہا اور کمپنی کو میری ٹائم انفراسٹرکچر، بندرگاہوں کی جدید کاری اور لاجسٹکس میں اپنی سرمایہ کاری کو مزید وسعت دینے کی ترغیب دی اور پاکستان کے کنیکٹیویٹی اور انفراسٹرکچر کی ترقی میں اس کے اہم کردار کو تسلیم کیا۔ یونین آف دی چیمبر اینڈ کموڈیٹی ایکسچینجز آف ترکیہ کے صدر کے ساتھ ملاقات میں وزیراعظم نے پاکستان اور ترکیہ کے درمیان کاروباری سطح پر باہمی روابط کو مضبوط بنانے کے لیے تنظیم کی مسلسل کوششوں کو سراہا۔

انہوں نے دونوں ممالک کے نجی شعبوں کے درمیان باقاعدہ رابطوں کے لیے ایک منظم ادارہ جاتی میکانزم قائم کرنے کی تجویز دی اور ٹی او بی بی کو دعوت دی کہ وہ سرمایہ کاری کے ابھرتے ہوئے مواقع کا براہِ راست جائزہ لینے کے لیے ایک اعلی سطحی کاروباری وفد کی قیادت کرتے ہوئے پاکستان کا دورہ کرے۔ ترک کاروباری رہنماں نے حکومت پاکستان کی اقتصادی اصلاحات، سرمایہ کاری کے ماحول میں بہتری اور سرمایہ کار دوست پالیسیوں کو سراہا۔

انہوں نے پاکستان کے معاشی نقطہ نظر پر اعتماد کا اظہار کیا اور پاکستان اور ترکی کے درمیان بڑھتی ہوئی اقتصادی شراکت داری میں اہم کردار ادا کرتے ہوئے متعدد سٹریٹجک شعبوں میں سرمایہ کاری کو بڑھانے اور طویل مدتی شراکت داری کو فروغ دینے میں اپنی دلچسپی کا اعادہ کیا۔