محسن گیلانی کی یواین فورم ون ورلڈ، ون گیم ون گول میں شرکت

اقوام متحدہ میں پاکستان کے فٹبال فار مینٹل ہیلتھ اقدام کی بھرپور پذیرائی

اتوار 19 جولائی 2026 18:15

اسلام آباد (اُردو پوائنٹ اخبارتازہ ترین - این این آئی۔ 19 جولائی2026ء) پاکستان فٹبال فیڈریشن کے صدر سید محسن گیلانی نے اقوامِ متحدہ کے عالمی فورم ون ورلڈ، ون گیم ون گول میں شرکت کی ، یو این عالمی فورم پر پاکستان کے فٹبال فار مینٹل ہیلتھ اقدام کو بھرپور پذیرائی ملی۔میڈیا رپورٹ کیمطابق فٹبال فار مینٹل ہیلتھ اقوام متحدہ یوتھ آفس کا منصوبہ ہے۔

اس فورم میں برازیل، انڈونیشیا، نائجیریا، انگلینڈ اور پاکستان کے نمائندوں نے شرکت کی .صدر پی ایف ایف محسن گیلانی نے اقوامِ متحدہ کے اعلیٰ سطحی فورم میں پاکستان کی نماندگی کرتے ہوئے اپنے تجربات دنیا کے سامنے پیش کیے اور بتایا کہ فٹبال فار مینٹل ہیلتھ اقدام پر پاکستان میں کس طرح عملدرآمد کیا گیا اور کھیل کو ذہنی صحت کے بارے میں آگاہی پیدا کرنے، نوجوانوں کو بااختیار بنانے اور معاشرتی بہتری کے لیے ایک موثر ذریعہ بنایا گیا۔

(جاری ہے)

محسن گیلانی نے کہا کہ پاکستان بھر میں ہزاروں بچوں تک ذہنی صحت کا پیغام پہنچایا، ہم تین سو سے زائد نوجوانوں کو مینٹل ہیلتھ ایمبیسیڈر بنانے میں کامیاب ہوئے جبکہ اپنے موجودہ اور سابق 80 قومی کھلاڑیوں کو بھی اس مہم کا حصہ بنایا پاکستان میں ہم نے ثابت کیا ہے کہ فٹبال حقیقی سماجی تبدیلی لا سکتا ہے۔ وزیراعظم یوتھ پروگرام کے چیئرمین رانا مشہود احمد خان اور پاکستان ویمنز نیشنل فٹسل ٹیم کی کھلاڑی سبل فواد طارق نے بھی تقریب میں شرکت کی