بنگلہ دیش اکتوبر سے اسرائیل کے سوا شق والے نئے پاسپورٹ جاری کرے گا

منگل 21 جولائی 2026 22:56

ڈھاکہ(اُردو پوائنٹ اخبارتازہ ترین - این این آئی۔ 21 جولائی2026ء) بنگلہ دیش کی وزارتِ داخلہ نے اعلان کیا ہے کہ رواں ماہ سے ایسے نئے پاسپورٹس کی چھپائی شروع کی جائے گی جن پر دوبارہ یہ عبارت درج ہوگی کہ یہ پاسپورٹ سوائے اسرائیل کے دنیا کے تمام ممالک کے لیے موثر ہے۔نئے پاسپورٹ اکتوبر سے شہریوں کو جاری کئے جانے کا امکان ہے۔ عرب ٹی وی کے مطابق وزارتِ داخلہ کے ایڈیشنل سیکرٹری ڈاکٹر ضیا الدین احمد نے گزشتہ روز بتایا کہ اس حوالے سے سرکاری حکم نامہ جاری کر دیا گیا ، جس کے مطابق نئے پاسپورٹ پر دوبارہ یہ عبارت درج کی جائے گی کہ یہ پاسپورٹ سوائے اسرائیل کے دنیا کے تمام ممالک کے لیے موثر ہے۔

انہوں نے کہا کہ نئے پاسپورٹس کی چھپائی رواں ماہ شروع ہوگی اور توقع ہے کہ عوام کو نئے پاسپورٹ کا اجرا اکتوبر سے ہو گا۔

(جاری ہے)

انہوں نے کہا کہ پاسپورٹ میں یہ تبدیلی حکومت کے سیاسی موقف کی عکاسی کرے گی، فلسطینی عوام کے ساتھ اظہارِ یکجہتی کا پیغام دے گی اور دنیا کو یہ واضح کرے گی کہ بنگلہ دیش فلسطینی عوام کے ساتھ کھڑا ہے۔ انہوں نے کہا کہ یہ فیصلہ بنگلہ دیشی عوام کی خواہشات کی بھی ترجمانی کرتا ہے۔ واضح رہے کہ 2021 تک بنگلہ دیشی پاسپورٹ پر یہ عبارت موجود تھی، تاہم سابق وزیراعظم شیخ حسینہ کی حکومت نے نئے پاسپورٹ متعارف کراتے وقت اسے ہٹا دیا تھا۔ غزہ میں اکتوبر 2023 سے جاری جنگ کے بعد اس شق کی بحالی کے مطالبات میں مزید شدت آ گئی تھی۔