کراچی،دوست ہی چور نکلا، پولیس نے 36 لاکھ روپے برآمد کر لیے

ویسٹ پولیس کی کارروائی، موبائل فون تاجر کے گھر نقب زنی میں ملوث ملزم گرفتار، لوٹی گئی رقم ریتی بجری کے نیچے چھپا رکھی تھی

بدھ 22 جولائی 2026 14:32

کراچی،دوست ہی چور نکلا، پولیس نے 36 لاکھ روپے برآمد کر لیے

کراچی(اُردو پوائنٹ اخبارتازہ ترین - این این آئی۔ 22 جولائی2026ء) کراچی کے ضلع ویسٹ پولیس نے نقب زنی کی ایک بڑی واردات کا سراغ لگاتے ہوئے مدعی کے قریبی دوست کو گرفتار کر لیا اور اس کی نشاندہی پر چوری ہونے والے 36 لاکھ روپے نقد برآمد کر لیے۔ پولیس کے مطابق ملزم نے لوٹی گئی رقم اپنے گھر میں ریتی اور بجری کے نیچے چھپا رکھی تھی، جسے کامیاب کارروائی کے دوران قبضے میں لے لیا گیا۔

ڈسٹرکٹ ویسٹ پولیس کے ترجمان کے مطابق مدعی مقدمہ فیاض خان، جو پیشے کے اعتبار سے موبائل فون کے تاجر ہیں، نے پولیس کو اطلاع دی تھی کہ ان کی غیر موجودگی میں نامعلوم ملزمان نے ان کے گھر میں نقب لگا کر لاکھوں روپے نقدی چوری کر لی۔ واقعے کے وقت اہل خانہ گاؤں گئے ہوئے تھے جبکہ فیاض خان اپنے کاروبار کے سلسلے میں گھر سے باہر تھے۔

(جاری ہے)

پولیس نے مقدمہ درج کرنے کے بعد جائے وقوعہ سے اہم شواہد اکٹھے کیے اور جدید تفتیشی طریقوں کے ساتھ خفیہ اطلاعات کی بنیاد پر کارروائی کرتے ہوئے ملزم ذیشان کو گرفتار کر لیا۔

دورانِ تفتیش ملزم نے واردات کا اعتراف کرتے ہوئے لوٹی گئی رقم چھپانے کی جگہ سے متعلق بھی آگاہ کیا۔پولیس کے مطابق ملزم کی نشاندہی پر اس کے گھر میں ریتی اور بجری کے نیچے چھپائی گئی 36 لاکھ روپے کی مکمل رقم برآمد کر لی گئی، جس کے بعد رقم قانونی کارروائی مکمل ہونے پر اصل مالک کے حوالے کیے جانے کا عمل شروع کر دیا گیا۔ترجمان نے کہا کہ ابتدائی تحقیقات سے معلوم ہوا ہے کہ ملزم مدعی کا قریبی دوست تھا اور اسے گھر کے حالات اور اہل خانہ کی غیر موجودگی سے متعلق مکمل معلومات حاصل تھیں، جس کا فائدہ اٹھاتے ہوئے اس نے واردات کی منصوبہ بندی کی۔

پولیس نے گرفتار ملزم کو مزید تفتیش کے لیے شعب? تفتیش کے حوالے کر دیا ہے، جبکہ یہ بھی جانچا جا رہا ہے کہ آیا واردات میں اس کے دیگر ساتھی بھی شامل تھے یا نہیں۔ حکام کے مطابق واقعے کے تمام پہلوؤں سے تحقیقات جاری ہیں اور مزید انکشافات کی توقع ہے۔