راولپنڈی میں ٹماٹر کی قیمت میں ہوشربا اضافہ، 500 روپے فی کلو تک پہنچ گیا

راولپنڈی (اُردو پوائنٹ اخبارتازہ ترین - اے پی پی۔ 22 جولائی2026ء) راولپنڈی میں ٹماٹر کی قیمتوں میں غیر معمولی اضافے نے شہریوں بالخصوص متوسط اور کم آمدنی والے طبقے کی مشکلات میں کئی گنا اضافہ کر دیا ہے۔ روزمرہ کے کھانے پکانے میں ٹماٹر ایک اہم اور لازمی جزو سمجھا جاتا ہے تاہم حالیہ مہنگائی کی لہر کے باعث اب اس کی خرید عام آدمی کی پہنچ سے باہر ہوتی جا رہی ہے۔

مارکیٹ ذرائع کے مطابق ٹماٹر کی قیمتوں میں اضافے کی بنیادی وجہ طلب اور رسد میں پیدا ہونے والا واضح فرق ہے۔ مقامی سبزی منڈیوں میں ٹماٹر کی محدود آمد کے باعث تھوک قیمتوں میں اضافہ ہوا جس کا براہ راست اثر پرچون مارکیٹ پر پڑا۔ دوسری جانب پٹرولیم مصنوعات کی قیمتوں میں اضافے سے ٹرانسپورٹ، لوڈنگ اور ان لوڈنگ کے اخراجات بھی بڑھ گئے ہیں جس کی وجہ سے سبزیوں کی قیمتوں میں مزید اضافہ ریکارڈ کیا جا رہا ہے۔

(جاری ہے)

شہریوں کا کہنا ہے کہ صرف پندرہ روز قبل ٹماٹر تقریباً 200 روپے فی کلو فروخت ہو رہا تھا لیکن مختصر عرصے میں اس کی قیمت میں تقریباً 300 روپے فی کلو کا غیر معمولی اضافہ ریکارڈ کیا گیا ہے اور اب شہر کے مختلف بازاروں میں ٹماٹر تقریباً 500 روپے فی کلو فروخت ہو رہا ہے۔ قیمتوں میں اس اچانک اضافے نے گھریلو بجٹ کو شدید متاثر کیا ہے جبکہ عام خاندانوں کے لیے روزمرہ کے کھانے تیار کرنا بھی مہنگا ہو گیا ہے۔

ٹماٹر مہنگا ہونے کے باعث بہت سے گھروں میں اس کے متبادل کے طور پر دہی، املی، لیموں کا رس اور ہلکی مقدار میں سرکہ استعمال کیا جا رہا ہے تاکہ سالن اور دیگر پکوانوں کا ذائقہ کسی حد تک برقرار رکھا جا سکے تاہم گھریلو خواتین کا کہنا ہے کہ ٹماٹر کا مکمل متبادل موجود نہیں، اس لیے اس کی بڑھتی ہوئی قیمت نے باورچی خانے کا بجٹ بری طرح متاثر کیا ہے۔

دوسری جانب ہوٹلوں، ریسٹورنٹس، ڈھابوں اور فوڈ پوائنٹس کے مالکان کا کہنا ہے کہ ٹماٹر کی قیمت میں اضافے سے کھانے تیار کرنے کی لاگت میں نمایاں اضافہ ہوا ہے جس کی وجہ سے کئی اشیائے خورونوش کی قیمتیں بڑھانے پر بھی غور کیا جا رہا ہے۔شہریوں نے حکومت اور ضلعی انتظامیہ سے مطالبہ کیا ہے کہ ٹماٹر سمیت دیگر سبزیوں کی بلا تعطل فراہمی یقینی بنائی جائے، مصنوعی مہنگائی، ذخیرہ اندوزی اور ناجائز منافع خوری کے خلاف سخت کارروائی کی جائے اور سرکاری نرخوں پر موثر عمل درآمد کرا کے عوام کو فوری ریلیف فراہم کیا جائے۔\395