افغان شہریوں کیلئے جعلی شناختی کارڈز بنانے والوں کا نیٹ ورک بے نقاب

بدھ 22 جولائی 2026 16:27

لاہور(اُردو پوائنٹ اخبارتازہ ترین - این این آئی۔ 22 جولائی2026ء) قانون نافذ کرنے والے اداروں اور وفاقی تحقیقاتی ادارے نے مشترکہ انٹیلی جنس آپریشن کے دوران افغان شہریوں کے لیے جعلی شناختی دستاویزات تیار کرنے والے مبینہ نیٹ ورک کا سراغ لگا کر نادرا کے 2افسران سمیت 4ملزمان کو گرفتار کر لیا ۔میڈیا رپورٹ میں ایف آئی اے کے ترجمان کے حوالے سے کہا گیا ہے کہ گرفتار ملزمان میں اسسٹنٹ ڈائریکٹر انعام الحق ،ڈپٹی اسسٹنٹ ڈائریکٹر فیاض احمد ،چوکیدار جنید احمد اور پرائیویٹ ایجنٹ محمد عمر شاہ شامل ہیں۔

ترجمان نے بتایا کہ ابتدائی تحقیقات کے مطابق ملزمان افغان شہریوں کے لیے غیر قانونی شناختی کارڈز کے اجراء ، سرکاری ریکارڈ میں ردوبدل اور دیگر غیر قانونی سرگرمیوں میں سہولت کاری میں ملوث تھے۔

(جاری ہے)

ابتدائی شواہد سے اس نیٹ ورک کے دہشتگرد عناصر سے ممکنہ روابط کی بھی نشاندہی ہوئی ہے جس کے بعد تحقیقات کا دائرہ مزید وسیع کر دیا گیا ہے۔کارروائی کے دوران اہم سرکاری ریکارڈ اور دیگر شواہد بھی تحویل میں لے لیے گئے ہیں۔

ترجمان ایف آئی اے کے مطابق مزید انکشافات اور گرفتاریاں متوقع ہیں اور اس نیٹ ورک سے وابستہ تمام سہولت کاروں اور مرکزی کرداروں کو قانون کے کٹہرے میں لایا جائے گا۔ترجمان کے مطابق ایف آئی اے اور دیگر قانون نافذ کرنے والے ادارے قومی سلامتی، دہشتگردی کی معاونت، غیر قانونی شناختی دستاویزات کے اجرا ء اور منظم جرائم پیشہ نیٹ ورکس کے مکمل خاتمے تک بلاامتیاز کارروائیاں جاری رکھیں گے۔