پنجاب میں ڈرائیونگ لائسنس کے اجرا میں تیزی، تین ہفتوں میں 4 لاکھ 64 ہزار سے زائد لائسنس جاری

بدھ 22 جولائی 2026 12:51

لاہور (اُردو پوائنٹ اخبارتازہ ترین - این این آئی۔ 22 جولائی2026ء) ڈی آئی جی ٹریفک پنجاب محمد وقاص نذیر کی ہدایت پر صوبہ بھر میں ڈرائیونگ لائسنس کے اجراء کا عمل مزید تیز کر دیا گیا ۔ ترجمان ٹریفک پولیس کے مطابق گزشتہ تین ہفتوں کے دوران 4لاکھ 64ہزار سے زائد ڈرائیونگ لائسنس جاری کیے گئے۔اعداد و شمار کے مطابق ایک لاکھ 65ہزار سے زائد شہریوں نے نئے لرننگ لائسنس حاصل کیے جبکہ ایک لاکھ 38ہزار سے زائد افراد کو ریگولر ڈرائیونگ لائسنس جاری کیے گئے۔

اسی عرصے میں ایک لاکھ 56ہزار سے زائد شہریوں نے لرننگ، ریگولر اور انٹرنیشنل ڈرائیونگ لائسنس کی تجدید بھی کروائی۔ترجمان کے مطابق ایک ہزار سے زائد شہریوں کو گم شدہ ڈرائیونگ لائسنس دوبارہ جاری کیے گئے جبکہ ڈھائی ہزار سے زائد افراد کو انٹرنیشنل ڈرائیونگ پرمٹ فراہم کیے گئے۔

(جاری ہے)

اس کے علاوہ 91ہزار سے زائد شہریوں نے آن لائن لائسنسنگ سہولیات سے استفادہ کیا، جبکہ 2لاکھ 80 ہزار سے زائد افراد نے ای ڈرائیونگ لائسنس ڈان لوڈ کیا۔

اس حوالے سے ڈی آئی جی ٹریفک پنجاب محمد وقاص نذیر نے کہا کہ بغیر ڈرائیونگ لائسنس گاڑی چلانا قانونا جرم ہے اور ایسے ڈرائیورز کے خلاف صوبہ بھر میں کریک ڈائون جاری ہے۔ انہوں نے خبردار کیا کہ بغیر لائسنس گاڑی چلانے والوں کو جرمانوں سمیت سخت قانونی کارروائی کا سامنا کرنا پڑے گا۔انہوں نے مزید کہا کہ پنجاب میں شہریوں کو باقاعدہ تربیت حاصل کرکے ڈرائیونگ کرنے کی ترغیب دی جا رہی ہے، جس کے مثبت نتائج سامنے آ رہے ہیں اور سیکھ کر گاڑی چلانے کے رجحان کے باعث ٹریفک حادثات میں کمی آئی ہے۔ ان کا کہنا تھا کہ ٹریفک قوانین کی پابندی ہی محفوظ سفر کی ضمانت ہے۔