آزاد کشمیر انتخابات پر بلاول بھٹو کے بیانات مسترد، شاہ غلام قادر کا شدید ردعمل

جمعرات 30 جولائی 2026 23:13

مظفرآباد (اُردو پوائنٹ اخبارتازہ ترین - آن لائن۔ 30 جولائی2026ء) مسلم لیگ (ن) آزاد کشمیر کے صدر شاہ غلام قادر نے چیئرمین پاکستان پیپلز پارٹی بلاول بھٹو زرداری کے آزاد کشمیر انتخابات سے متعلق بیانات کو مسترد کرتے ہوئے کہا ہے کہ عوام اپنا فیصلہ دے چکے ہیں اور انتخابی نتائج پر بلاجواز اعتراضات حقائق کے منافی ہیں۔شاہ غلام قادر نے اپنے بیان میں کہا کہ بلاول بھٹو ان دنوں مظفرآباد میں موجود ہیں اور آزاد کشمیر انتخابات کے حوالے سے گمراہ کن بیانات دے رہے ہیں، جن کی مسلم لیگ (ن) شدید مذمت کرتی ہے۔

انہوں نے کہا کہ آزاد کشمیر کے عوام نے مسلم لیگ (ن) پر اعتماد کا اظہار کیا ہے اور اس مینڈیٹ کا احترام کیا جانا چاہیے۔مسلم لیگ (ن) آزاد کشمیر کے صدر نے نکیال نشست پر پیپلز پارٹی کے اعتراضات کو بے بنیاد قرار دیتے ہوئے کہا کہ نکیال میں فتح محمد کریلوی کے خاندان کی کامیابی تاریخی سیاسی پس منظر رکھتی ہے اور سردار عمیر نعیم کی کامیابی عوامی اعتماد کا واضح اظہار ہے۔

(جاری ہے)

انہوں نے کہا کہ راجہ ایاز کی کامیابی بھی عوام کے اعتماد کی عکاس ہے، جبکہ بعض حلقوں میں پیپلز پارٹی کا امیدوار ہی موجود نہیں تھا، اس لیے وہاں دھاندلی کے الزامات سمجھ سے بالاتر ہیں۔شاہ غلام قادر نے سوال اٹھایا کہ میرپور سٹی میں مبینہ دھاندلی کے الزامات پر پیپلز پارٹی خاموش کیوں ہے۔ انہوں نے کہا کہ بلاول بھٹو کو چاہیے کہ وہ آزاد کشمیر کا ماحول خراب کرنے کے بجائے حلقوں کا دورہ کریں تاکہ عوامی رائے خود سامنے آ سکے۔

انہوں نے کہا کہ آزاد کشمیر کے حقوق پر سیاست اور بلیک میلنگ کسی صورت قبول نہیں کی جائے گی، مسلم لیگ (ن) آزاد کشمیر کسی دباؤ میں نہیں آئے گی اور عوامی فیصلے کا مکمل احترام کرے گی۔لیگی رہنما نے کہا کہ میرپور ڈویڑن کے نتائج سے پیپلز پارٹی پریشان ہے، جبکہ اگر پی ٹی آئی کے امیدوار شامل نہ کیے جاتے تو پیپلز پارٹی کے پاس کئی حلقوں میں امیدوار بھی موجود نہ ہوتے۔

شاہ غلام قادر نے کہا کہ مسلم لیگ (ن) کی قیادت کے خلاف بیان بازی سے قبل حقائق کا جائزہ لیا جانا چاہیے۔ انہوں نے دعویٰ کیا کہ 2 اگست کو مظفرآباد ڈویڑن کی تمام 9 نشستوں پر مسلم لیگ (ن) کامیابی حاصل کرے گی۔انہوں نے بلاول بھٹو کو مشورہ دیا کہ وہ اپنے معلوماتی ذرائع کا ازسرنو جائزہ لیں اور آزاد کشمیر کے عوام کے فیصلے کو تسلیم کریں۔