ن لیگ آزاد جموں و کشمیر میں حکومت بنانے کی پوزیشن میں آچکی، شاہ غلام قادر

جمعرات 6 اگست 2026 13:19

مظفر آباد(اُردو پوائنٹ اخبارتازہ ترین - این این آئی۔ 06 اگست2026ء) پاکستان مسلم لیگ (ن) آزاد جموں و کشمیر کے صدر اور نو منتخب رکن قانون ساز اسمبلی شاہ غلام قادر نے کہا ہے کہ ن لیگ حکومت بنانے کی پوزیشن میں آچکی ہے اور اسمبلی میں واضح اکثریت حاصل کر رہی ہے۔ایک انٹرویو میںشاہ غلام قادر نے کہا کہ آزاد کشمیر کے باشعور عوام نے مسلم لیگ (ن) پر بھرپور اعتماد کا اظہار کیا ہے اور اب تک ہونے والے انتخابات میں ہماری جماعت کو بھاری اکثریت سے کامیاب بنایا،یہ کامیابی عوام کے اعتماد، کارکنوں کی محنت اور جماعت کی بہترین سیاسی حکمت عملی کا نتیجہ ہے۔

وزیراعظم آزاد کشمیر کے حوالے سے ایک سوال کے جواب میں شاہ غلام قادر نے کہا کہ وزیراعظم کے انتخاب کا فیصلہ آئینی اور جماعتی مشاورت کے مطابق تمام انتخابی مراحل مکمل ہونے کے بعد کیا جائے گا۔

(جاری ہے)

انہوں نے کہا کہ ہمیشہ اچھے کی امید رکھنی چاہیے، ہر سیاست دان کو آگے بڑھنے کی امید اور خواہش رکھنی چاہیے۔ مجھے بھی وزیراعظم کے منصب کے لیے اچھی امید ہے، تاہم حتمی فیصلہ مسلم لیگ (ن) کی پارلیمانی پارٹی اور قیادت کرے گی۔

کالعدم ایکشن کمیٹی سے متعلق سوال کے جواب میں انہوں نے کہا کہ ایکشن کمیٹی کے ساتھ معاملات کو بہتر انداز میں حل کرنا اس وقت کی حکومت، بالخصوص پاکستان پیپلز پارٹی کی ذمہ داری تھی، لیکن وہ اس ذمہ داری کو مؤثر انداز میں ادا کرنے میں ناکام رہی۔ انہوں نے کہا کہ پیپلز پارٹی عوامی توقعات پر پورا نہیں اتر سکی اور نہ ہی مثبت حکومتی کردار ادا کر سکی ہے۔

انہوں نے کہا کہ ان کی رائے میں پیپلز پارٹی آزاد کشمیر کے انتخابات میں تاخیر چاہتی تھی، تاہم وہ اپنے اس مقصد میں کامیاب نہیں ہو سکی اور انتخابات آئینی تقاضوں کے مطابق منعقد ہوئے، جس میں عوام نے اپنا فیصلہ مسلم لیگ (ن) کے حق میں دے دیا۔شاہ غلام قادر نے مزید کہا کہ مسلم لیگ (ن) کی حکومت قائم ہونے کے بعد عوام کو درپیش تمام اہم مسائل، آئینی معاملات اور دیگر حساس ایشوز کو مکمل طور پر آئین، قانون اور جمہوری روایات کے مطابق حل کیا جائے گا۔

اوورسیز کشمیریوں کے حوالے سے گفتگو کرتے ہوئے شاہ غلام قادر نے کہا کہ بیرون ملک مقیم کشمیری آزاد کشمیر کا قیمتی سرمایہ ہیں۔ اوورسیز کشمیری ہمارے جسم کا حصہ ہیں۔ انہوں نے ہمیشہ آزاد کشمیر کی معیشت، تعمیر و ترقی اور قومی معاملات میں اہم کردار ادا کیا ہے۔ انہوں نے آزاد کشمیر کے عوام اور بیرون ملک مقیم کشمیریوں کو یقین دلایا کہ مسلم لیگ (ن) کسی صورت انہیں مایوس نہیں کرے گی اور عوامی اعتماد پر پورا اترنے کے لیے بھرپور محنت کرے گی۔