یونیورسٹی آف چائلڈ ہیلتھ سائنسز کے زیر اہتمام پہلی سالانہ دو روزہ پیڈیاٹرک اپ ڈیٹ کانفرنس 2026 کا انعقاد

لاہور (اُردو پوائنٹ اخبارتازہ ترین - این این آئی۔ 07 اگست2026ء) یونیورسٹی آف چائلڈ ہیلتھ سائنسز کے زیر اہتمام پہلی سالانہ دو روزہ پیڈیاٹرک اپ ڈیٹ کانفرنس 2026 کے افتتاحی سیشن میںصوبائی وزیر صحت خواجہ سلمان رفیق نے بطور مہمان خصوصی شرکت کی۔صوبائی وزیر صحت خواجہ سلمان رفیق نے اپنے خطاب میں کہا کہ یہ محض ایک عام طبی کانفرنس نہیں بلکہ مسلسل تعلیم، باہمی تعاون اور ثبوت پر مبنی طبی مشق کے ذریعے بچوں کی صحت کی دیکھ بھال کو بہتر بنانے کی ایک مضبوط کوشش کا آغاز ہے۔

اس کانفرنس کی سب سے بڑی کامیابیوں میں سے ایک پاکستان کی اپنی بچوں کی ایمرجنسی گائیڈ لائنز (ہدایات) کی تیاری ہے۔ بین الاقوامی گائیڈ لائنز یقیناً بہت مفید ہیں، لیکن پاکستان کو ایسی گائیڈ لائنز کی بھی ضرورت ہے جو بیماریوں، دستیاب سہولیات، ہمارے ہیلتھ کیئر سسٹم اور ڈاکٹروں و ہسپتالوں کو درپیش حقائق کے عین مطابق ہوں۔

(جاری ہے)

یہ گائیڈ لائنز کئی مہینوں کی محنت کا نتیجہ ہیں۔

ماہرین نے ضروری اصلاحات کیں اور ایک قومی اتفاقِ رائے قائم کیا۔بین الاقوامی ماہرین کے تعاون اور ہمارے مقامی ماہرین کی لگن کے باعث عالمی معلومات و علم کو پاکستانی بچوں کی ضروریات کے مطابق ڈھالا گیا ہے۔انہوںنے کہا کہ مجھے امید ہے کہ یہ گائیڈ لائنز پورے پاکستان کے ہسپتالوں اور ایمرجنسی شعبوں تک پہنچیں گی، ڈاکٹروں کو بہتر فیصلے کرنے میں مدد دیں گی، اور اس بات کو یقینی بنائیں گی کہ ہر بچے کو محفوظ، بروقت اور معیاری صحت کی دیکھ بھال میسر آئے۔

امید ہے کہ سالانہ پیڈیاٹرک اپ ڈیٹ پاکستان میں بچوں کی صحت کو بہتر بنانے، باہمی تعاون، تحقیق اور سیکھنے کا ایک دیرپا پلیٹ فارم ثابت ہوگا۔صوبائی وزیر صحت نے بتایا کہ وزیراعلیٰ مریم نواز ہیلتھ کیئر سسٹم کو مضبوط بنانے کے لیے بڑی اصلاحات لا رہی ہیں۔بچوں کے علاج اور صحت کی بہتری کے لیے متعدد اہم اقدامات شروع کیے گئے ہیں، جن میں وزیراعلیٰ چلڈرنز ہارٹ سرجری پروگرام، گردے اور جگر کی پیوند کاری ، بون میرو ٹرانسپلانٹ، کوکلیر امپلانٹس (سماعت کے آلات)، قرنیہ (آنکھ) کی پیوند کاری، کینسر کا علاج، بالغوں کی ہارٹ سرجری، اور اسٹروک مینجمنٹ پروگرام شامل ہیں۔

پنجاب میں مفت ڈائیلاسز کی سہولیات بھی فراہم کی جا رہی ہیں۔ معیاری ہیلتھ کیئر تک رسائی کو بہتر بنانے کے لیے حکومت بہاولپور اور راولپنڈی میں نئے چلڈرنز ہسپتال، کارڈیالوجی انسٹی ٹیوٹس، کینسر ہسپتال، برن یونٹس اور میڈیکل کالجز قائم کر رہی ہے۔ وزیراعلیٰ پنجاب کی بصیرت افروز قیادت میں ڈاکٹروں، سینئر و جونیئر کنسلٹنٹس، نرسوں، پیرامیڈیکل اسٹاف، تکنیکی ماہرین اور دیگر ہیلتھ کیئر پیشہ ور افراد کے لئے ہزاروں نئی آسامیاں تخلیق کی گئی ہیں۔

وائس چانسلر یونیورسٹی آف چائلڈ ہیلتھ سائنسز پروفیسر مسعود صادق نے وزیر صحت خواجہ سلمان رفیق کی آمد پر شکریہ ادا کرتے ہوئے کہا کہ سلمان رفیق کی نظام صحت کی بہتری کیلئے گراں قدر خدمات ہیں۔کانفرنس میں چیئرمین وزیر اعلیٰ ایڈوائزری کمیٹی برائے امراض قلب ڈاکٹر فرقد عالمگیر، پروفیسر محمود شوکت، پروفیسر سلیم، پروفیسر ہما چیمہ، پروفیسر ساجد مقبول، وائس چانسلر پروفیسر ڈاکٹر مسعود صادق، پرو وائس چانسلر پروفیسر ڈاکٹر جنید رشید، ایم ڈی چلڈرن ہسپتال پروفیسر ٹیپو سلطان، ایگزیکٹو ڈائریکٹر پنجاب انسٹی ٹیوٹ آف کارڈیالوجی پروفیسر ڈاکٹر عمران شاہ، وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمد معین، پرنسپل امیر الدین میڈیکل کالج و جنرل ہسپتال پروفیسر ڈاکٹر فاروق افضل، ایم ایس جنرل ہسپتال ڈاکٹر فریاد حسین،ملکی و بین الاقوامی مقررین کے علاوہ پاکستان پیڈریاٹک ایسوسی ایشن اور ایسوسی ایشن آف فزیشنز آف پاکستان کے ذمہ داران نے بھی شرکت کی۔