ایل اے 16 کے چھ پولنگ اسٹیشنوں کو بار بار بند اور کھولنے کا معاملہ، پاکستان پیپلزپارٹی کی الیکشن کمیشن سے شکایت جمع

پیر 10 اگست 2026 21:44

مظفرآباد(اُردو پوائنٹ اخبارتازہ ترین - آن لائن۔ 10 اگست2026ء) پاکستان پیپلزپارٹی نے حلقہ ایل اے 16 باغ تھری شرقی کے چھ پولنگ اسٹیشنوں کو بار بار بند اور دوبارہ کھولنے کے خلاف چیف الیکشن کمشنر آزاد جموں و کشمیر کو انتہائی ہنگامی شکایت جمع کرادی۔پاکستان پیپلزپارٹی اور حلقہ ایل اے 16 کے امیدوار سردار قمر زمان کی جانب سے جمع کرائی گئی شکایت کے مطابق پولنگ اسٹیشن نمبر 119، 120، 124، 125، 128 اور 129 پر پولنگ کا عمل مسلسل جاری رہنے کے بجائے بار بار بند اور دوبارہ شروع کیا جارہا ہے، جس کے باعث ان پولنگ اسٹیشنوں پر پولنگ وقفوں وقفوں سے ہورہی ہے۔

پاکستان پیپلزپارٹی نے مؤقف اختیار کیا کہ پولنگ کو بار بار بند کرنے سے یہ تعین کرنا مشکل ہوجائے گا کہ مجموعی طور پر کتنی دیر پولنگ معطل رہی اور اس دوران کتنے ووٹرز ووٹ ڈالے بغیر واپس چلے گئے۔

(جاری ہے)

پاکستان پیپلزپارٹی نے مطالبہ کیا کہ چھ پولنگ اسٹیشنوں کے پریزائیڈنگ افسران کو ہر مرتبہ پولنگ بند اور بحال ہونے کا وقت، پولنگ بند کرنے کا حکم دینے والے شخص اور اس کی وجہ تحریری طور پر ریکارڈ کرنے کا پابند بنایا جائے جبکہ ریٹرننگ آفیسر یہ تمام تفصیلات الیکشن کمیشن کو فراہم کرے۔

پاکستان پیپلزپارٹی نے پولنگ بند ہونے کے دوران بیلٹ بکسوں کی حفاظت پر بھی تحفظات کا اظہار کرتے ہوئے مطالبہ کیا کہ کسی پولنگ اسٹیشن کو بند کرنے سے پہلے بیلٹ بکس، بیلٹ پیپرز اور دیگر انتخابی مواد تمام امیدواروں کے پولنگ ایجنٹس کی موجودگی میں سیل کیا جائے۔پاکستان پیپلزپارٹی نے مقف اختیار کیا کہ بار بار پولنگ بند ہونے سے اس دوران پولنگ اسٹیشن پہنچنے والے ووٹرز حق رائے دہی سے محروم ہوتے ہیں اور یہ عمل آزاد جموں و کشمیر الیکشنز ایکٹ 2020 اور انتخابی ضابطہ اخلاق کی خلاف ورزی ہے۔پاکستان پیپلزپارٹی آزاد کشمیر الیکشن سیل کے انچارج عبدالشکور نے پارٹی اور حلقہ ایل اے 16 کے امیدوار سردار قمر زمان کی جانب سے یہ شکایت چیف الیکشن کمشنر آزاد جموں و کشمیر کو ارسال کی ہے۔