Live Updates

صدر پی ایف ایف محسن گیلانی کی سعودی عرب میں پاکستان کے سفیر احمد فاروق سے ملاقات

منگل 18 اگست 2026 23:52

ریاض/اسلام آباد (اُردو پوائنٹ اخبارتازہ ترین - اے پی پی۔ 18 اگست2026ء) پاکستان فٹ بال فیڈریشن (پی ایف ایف) کے صدر محسن گیلانی نے ریاض میں سعودی عرب میں پاکستان کے سفیر احمد فاروق سے ملاقات کی۔ ملاقات کے دوران پاکستان میں فٹ بال کے فروغ اور ترقی کے لیے باہمی تعاون کو مزید مستحکم کرنے اور نئے مواقع تلاش کرنے پر تبادلہ خیال کیا گیا۔ اس موقع پر سعودی عرب میں متعلقہ اداروں اور اسٹیک ہولڈرز کے ساتھ ممکنہ تعاون اور روابط بڑھانے کے امکانات پر بھی گفتگو ہوئی تاکہ پاکستان کے فٹ بال ایکو سسٹم کو مزید مضبوط بنایا جا سکے اور کھلاڑیوں و کھیلوں کے اداروں کے لیے نئے مواقع پیدا ہوں۔

صدر پی ایف ایف محسن گیلانی نے سفیر احمد فاروق کو پاکستان فٹبال فیڈریشن کی جانب سے قومی اور گراس روٹس سطح پر فٹبال کے فروغ کے لیے جاری اقدامات اور مستقبل کے منصوبوں سے آگاہ کیا۔

(جاری ہے)

سفیر احمد فاروق نے پاکستان فٹبال فیڈریشن کی کاوشوں کو سراہتے ہوئے پاکستان اور سعودی عرب کے درمیان کھیلوں کے شعبے میں مزید تعاون اور روابط کے فروغ کے لیے اپنے تعاون کا یقین دلایا۔ ملاقات میں اس عزم کا اعادہ کیا گیا کہ کھیل بالخصوص فٹبال پاکستان اور سعودی عرب کے عوام کے درمیان روابط کو مزید مضبوط بنانے اور دونوں برادر ممالک کے دیرینہ تعلقات کو مزید گہرا کرنے کے لیے ایک مؤثر پلیٹ فارم ثابت ہو سکتا ہے۔