ڈسٹرکٹ ووٹر ایجوکیشن کمیٹی چنیوٹ کے زیرِ اہتمام جسمانی طور پر معذور افراد کے لیے خصوصی ووٹر آگاہی سیشن کا انعقاد کیا گیا

جمعہ 21 اگست 2026 17:56

چنیوٹ (اُردو پوائنٹ اخبارتازہ ترین - اے پی پی۔ 21 اگست2026ء) الیکشن کمیشن آف پاکستان کی ہدایات کی روشنی میں دفتر ڈسٹرکٹ الیکشن کمشنر چنیوٹ میں ڈسٹرکٹ ووٹر ایجوکیشن کمیٹی چنیوٹ کے زیرِ اہتمام جسمانی طور پر معذور افراد کے لیے خصوصی ووٹر آگاہی سیشن کا انعقاد کیا گیا۔ سیشن میں جسمانی طور پر معذور افراد، ڈپٹی ڈائریکٹر سوشل ویلفیئر چنیوٹ، نادرا کے نمائندے اور ڈسٹرکٹ ووٹر ایجوکیشن کمیٹی کے اراکین نے شرکت کی۔

ڈسٹرکٹ الیکشن کمشنر چنیوٹ اسد اللہ عتیق نے سیشن سے خطاب کرتے ہوئے تمام شرکاء کو خوش اآمدید کہا۔ اپنے خطاب کے دوران انہوں نے کہا کہ جسمانی طور پر معذور افراد معاشرے کا اہم حصہ ہیں اور انہیں قومی و جمہوری دھارے میں شامل کرنا ہم سب کی مشترکہ ذمہ داری ہے۔

(جاری ہے)

انہوں نے کہا کہ الیکشن کمیشن آف پاکستان ملک کے تمام شہریوں کو انتخابی عمل میں بھرپور شرکت کے مساوی مواقع فراہم کرنے کے لیے کوشاں ہے۔

انہوں نے شرکاء کو بتایا کہ الیکشن ایکٹ 2017 کی شق 93 (c) کے تحت جسمانی طور پر معذور افراد کو پوسٹل بیلٹ کی ذریعے ووٹ کاسٹ کرنے کی خصوصی اجازت دی گئی ہے۔ انہوں نے شرکاء کو ووٹ کی اہمیت، اس کے استعمال اور طریقہ کار کے بارے میں تفصیلی آگاہی فراہم کی۔ اس موقع پر ڈسٹرکٹ الیکشن کمشنر چنیوٹ اسد اللہ عتیق نے پوسٹل بیلٹ کے متعلقہ فارم پُر کرنے کی عملی مشق بھی کروائی گئی تاکہ شرکاء پوسٹل بیلٹ کے طریقہ کار کو عملی طور پر سمجھ سکیں۔

بعد ازاں شرکاء، بالخصوص جسمانی طور پر معذور افراد کو پوسٹل بیلٹ کی اہمیت، طریقہ کار اور استعمال کے حوالے سے ایک خصوصی آگاہی ویڈیو بھی دکھائی گئی۔اس موقع پر ڈپٹی ڈائریکٹر سوشل ویلفیئر چنیوٹ نے بھی شرکاء سے خطاب کیا۔ انہوں نے الیکشن کمیشن آف پاکستان کی جانب سے معذور افراد سمیت مختلف طبقات کو جمہوری عمل میں شامل کرنے کے لیے جاری پانچ ماہ کے ووٹر آگاہی پروگرام کو سراہا اور کہا کہ کسی بھی طرح سے جسمانی طور پر معذور افراد کو قومی و جمہوری دھارے میں شامل کرنے کے لیے الیکشن کمیشن کی کاوشیں قابلِ تحسین ہیں۔\378