ًپاکستان اورملائیشیا کا انسداد دہشتگردی و جرائم کی روک تھام میں تعاون بڑھانے پر اتفاق

اسلام آباد (اُردو پوائنٹ اخبارتازہ ترین - آن لائن۔ 22 اگست2026ء) پاکستان اور ملائیشیا نے انسداد دہشتگردی، انسداد منشیات، غیر قانونی امیگریشن، انسانی اسمگلنگ اور سائبر کرائمز کی روک تھام کے لیے باہمی تعاون مزید بڑھانے، انٹیلی جنس شیئرنگ کو مؤثر بنانے اور دونوں ممالک کی وزارت داخلہ کے درمیان رابطہ کاری کے لیے جوائنٹ ورکنگ گروپ قائم کرنے پر اتفاق کیا ہے۔

ملائیشیا کے وزیر داخلہ سیف الدین ناسوتیون بن اسماعیل نے وزارت داخلہ اسلام آباد کا دورہ کیا، جہاں وزیر داخلہ محسن نقوی سے ون آن ون ملاقات کے بعد دونوں ممالک کے وزرائے داخلہ کے درمیان وفود کی سطح پر مذاکرات بھی ہوئے۔ملاقات میں دوطرفہ سکیورٹی تعاون سمیت انسداد دہشتگردی، انسداد منشیات، غیر قانونی امیگریشن اور سائبر کرائمز کی روک تھام کے امور پر تفصیلی تبادلہ خیال کیا گیا۔

(جاری ہے)

دونوں جانب سے دہشتگردوں اور منشیات فروشوں کے خلاف کارروائی کے لیے انٹیلی جنس شیئرنگ بڑھانے اور انسانی اسمگلنگ کے خلاف مشترکہ حکمت عملی کو مزید مؤثر بنانے پر اتفاق کیا گیا۔پاکستان اور ملائیشیا کی وزارت داخلہ کے درمیان تعلقات کو فروغ دینے کے لیے جوائنٹ ورکنگ گروپ قائم کرنے کا فیصلہ بھی کیا گیا، جبکہ پاکستان کا اعلیٰ سطح کا وفد جلد ملائیشیا کا دورہ کرے گا۔

مذاکرات میں کوسٹ گارڈز کے شعبے میں تعاون اور تربیتی پروگرامز کے حوالے سے بھی بات چیت ہوئی۔ دونوں ممالک نے نیشنل پولیس اکیڈمی پاکستان اور رائل ملائیشین پولیس کالج کے مابین تعاون بڑھانے پر اتفاق کیا۔ وزیر داخلہ محسن نقوی نے کہا کہ پاکستان ملائیشیا کے کوسٹ گارڈ کے شعبے میں تجربات سے استفادہ کرنا چاہتا ہے۔ انہوں نے کہا کہ امید ہے ملائیشین وزیر داخلہ کا دورہ دونوں ممالک کے درمیان تعلقات کو اگلی سطح پر لے جانے میں اہم سنگ میل ثابت ہوگا۔

محسن نقوی نے کہا کہ ملائیشیا مسلم ممالک میں تیز رفتار ترقی کرنے والا ملک ہے اور پاکستان ملائیشیا کے ساتھ دوطرفہ تعلقات کو مزید مستحکم بنانے کا خواہاں ہے۔ملاقات میں پاکستان اور ملائیشیا کے درمیان سیاحت کے فروغ اور ویزا سہولیات میں آسانی کے امور بھی زیر بحث آئے۔ وفاقی وزیر داخلہ نے کہا کہ ملائیشیا پاکستانی شہریوں کے لیے سیاحت کے حوالے سے بہترین آپشن ہے۔

انہوں نے مزید کہا کہ پاکستانیوں کے لیے ورک کوٹہ بڑھنے سے مزید پاکستانی قانونی طریقے سے ملائیشیا جا سکیں گے، جس سے دونوں ممالک کے عوامی روابط اور معاشی تعاون کو فروغ ملے گا۔دونوں وزرائے داخلہ نے پاکستان اور ملائیشیا کے دیرینہ دوطرفہ تعلقات کو مزید مضبوط بنانے اور سکیورٹی سمیت باہمی دلچسپی کے تمام شعبوں میں تعاون بڑھانے کے عزم کا اعادہ کیا۔ملاقات کے موقع پر وزیر مملکت داخلہ طلال چوہدری، وفاقی سیکرٹری داخلہ، ڈی جی ایف آئی اے، آئی جی فیڈرل کانسٹیبلری، نیشنل کوآرڈینیٹر نیکٹا، ڈی جی پاسپورٹ، چیف کمشنر و آئی جی اسلام آباد سمیت دیگر اعلیٰ حکام بھی موجود تھے۔