بھارت کی نوآبادیاتی پالیسیاں جموں و کشمیر کی شناخت کے لیے خطرہ ہیں، حریت کانفرنس

بھارت کی نو آبادیاتی پالیسیاں علاقے کے مسلم اکثریتی تشخص، شناخت اور سیاسی حقوق کے لیے سنگین خطرہ بن رہی ہیں

اتوار 23 اگست 2026 14:10

سرینگر(اُردو پوائنٹ اخبارتازہ ترین - این این آئی۔ 23 اگست2026ء) غیرقانونی طورپر بھارت کے زیر قبضہ جموں وکشمیر میں کل جماعتی حریت کانفرنس نے خبردار کیا ہے کہ بھارت کی نو آبادیاتی پالیسیاں علاقے کے مسلم اکثریتی تشخص، شناخت اور سیاسی حقوق کے لیے سنگین خطرہ بن رہی ہیں۔کشمیر میڈیا سروس کے مطابق حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ اگست 2019 میں نئی دہلی کی جانب سے مقبوضہ جموں و کشمیر کی خصوصی حیثیت یکطرفہ طور پر ختم کیے جانے کے بعد مودی حکومت نے علاقے میں آبادی کا تناسب تبدیل کرنے کی کوششیں تیز کر دی ہیں۔

انہوں نے کہا کہ لاکھوں غیر مقامی افراد کو ڈومیسائل سرٹیفکیٹس جاری کیے جانے سے مقبوضہ علاقے کے آبادیاتی توازن میں بنیادی تبدیلی کا خطرہ پیدا ہو گیا ہے۔

(جاری ہے)

ترجمان نے کہاکہ ڈومیسائل پالیسی کو مقبوضہ جموں و کشمیر میں غیر کشمیریوں کی آباد کرنے اورنوآبادیاتی ایجنڈے کو آگے ب-ڑھانے کے لئے ایک ہتھیارکے طورپر استعمال کیاجارہاہے۔ انہوں نے کہا آبادی کا تناسب تبدیل کرنا ان اہم مقاصد میں شامل ہے جن کے تحت دفعہ 370 ختم کیا گیا، کیونکہ بھارت کشمیریوں کی منفرد شناخت کو کمزور اور ان کے سیاسی و علاقائی حقوق کو محدود کرنا چاہتا ہے۔

انہوں نے کہا کہ غیر مقامی افراد کی آبادکاری اور زمین اور شہریت سے متعلق قوانین میں تبدیلیاں کشمیریوں کے اپنی زمین اور وسائل پر اختیار کے لیے خطرہ ہیں اور یہ متنازعہ علاقے کے سیاسی تشخص کو مستقل طور پر تبدیل کر سکتے ہیں۔ حریت کانفرنس نے کہاکہ آبادی کے تناسب میں اس طرح کی تبدیلی جموں و کشمیر کی متنازعہ حیثیت سے متصادم اور اقوام متحدہ کی متعلقہ قراردادوں کی خلاف ورزی ہے، جن میں اپنے سیاسی مستقبل کا تعین کرنے کے کشمیری عوام کے حق کو تسلیم کیا گیا ہے۔

ترجمان نے تشویش ظاہر کی کہ بھارت کی نو آبادیاتی پالیسیاں بین الاقوامی قانون کے تحت بالخصوص علاقے پر طویل عرصے سے جاری قبضے کے تناظر میں سنگین سوالات پیدا کرتی ہیں ۔انہوں نے اقوام متحدہ اور عالمی برادری پر زور دیا کہ وہ بھارت کے ان اقدامات کا نوٹس لیں اور مقبوضہ جموں و کشمیر کے آبادیاتی تشخص کو تبدیل کرنے کی کسی بھی کوشش کو روکیں۔ترجمان نے زور دیا کہ تنازعہ کشمیر کو یکطرفہ آئینی، انتظامی یا آبادیاتی اقدامات کے ذریعے حل نہیں کیا جا سکتا۔ انہوں نے کشمیری عوام کی خواہشات کے مطابق منصفانہ اور پائیدار حل کو یقینی بنانے کے لیے اقوام متحدہ کی متعلقہ قراردادوں پر عمل درآمد کا مطالبہ کیا۔