سینٹرل جیل سرینگر سے دو زیرِ سماعت قیدی فرار

دونوں قیدی ہائی سکیورٹی جیل کی سامنے والی دیوار پھلانگ کر فرار ہوگئے

پیر 24 اگست 2026 14:48

سرینگر(اُردو پوائنٹ اخبارتازہ ترین - این این آئی۔ 24 اگست2026ء) غیرقانونی طورپر بھارت کے زیر قبضہ جموں وکشمیر میں سرینگر کی سینٹرل جیل سے دو زیرِ سماعت قیدی فرار ہو گئے۔کشمیر میڈیا سروس کے مطابق فرار ہونے والے قیدیوںمیں ایک غیر کشمیری بھارتی شہری بھی شامل ہے ۔ ان کے خلاف بچوں کو جنسی تشدد سے بچانے کے قانون (POCSO) کے تحت الگ الگ مقدمات میں کارروائی کی گئی تھی۔

حکام نے بتایا کہ دونوں قیدی ہائی سکیورٹی جیل کی سامنے والی دیوار پھلانگ کر فرار ہوگئے۔

(جاری ہے)

فرار ہونے والے قیدیوں کی شناخت بھارتی ریاست راجستھان کے علاقے سدن پورہ کے رہائشی فرمان خان اور جنوبی کشمیرمیں ضلع اسلام آباد کے علاقے سنگلن چھترگل کے رہائشی مختار احمد گوجر کے طور پر ہوئی ہے۔حکام کے مطابق فرمان خان کو 23 جون کو ضلع گاندربل کے لار پولیس اسٹیشن میں درج ایف آئی آر کے سلسلے میں جیل میں رکھا گیا تھا۔اسی طرح مختار احمد گوجر کو 13 اپریل کو سرینگر کے صورہ پولیس اسٹیشن میں درج ایک الگ ایف آئی آر کے سلسلے میں جیل میں رکھا گیا تھا۔حکام نے بتایا کہ فرار ہونے والے قیدیوں کا سراغ لگانے اور انہیں گرفتار کرنے کے لیے بڑے پیمانے پر تلاش شروع کر دی گئی ہے۔