مریم نواز نے سرکاری طیارے کے نجی استعمال کے اخراجات ادا کردیئے

وزیراعلیٰ پنجاب نے حال ہی میں اپنی بیٹی کی گریجویشن تقریب میں شرکت کیلئے برطانیہ کا سفر کیا تھا

ساجد علی جمعرات 17 ستمبر 2026 14:02

مریم نواز نے سرکاری طیارے کے نجی استعمال کے اخراجات ادا کردیئے

لاہور (اُردو پوائنٹ اخبارتازہ ترین۔ 17 ستمبر 2026ء) وزیراعلیٰ پنجاب مریم نواز نے لندن کے نجی دورے کے لیے سرکاری طیارے کے استعمال کے اخراجات ادا کردیئے۔ اطلاعات کے مطابق وزیراعلیٰ پنجاب مریم نواز کی جانب سے ان کے حالیہ لندن کے نجی دورے کے لیے سرکاری طیارے کے استعمال پر اٹھنے والے اخراجات کی مد میں 2 کروڑ 71 لاکھ 94 ہزار 4 روپے کی رقم سرکاری خزانے میں جمع کروا دی گئی ہے۔

وزیراعلیٰ مریم نواز نے سرکاری طیارے کے استعمال پر آنے والے اخراجات ادا کر دیئے pic.twitter.com/IiNWCqqQtk
— SAM (@mohsinir) September 17, 2026

واضح رہے کہ اس سے قبل صحافی اور تجزیہ کار سید عمران شفقت نے پنجاب کے سرکاری طیارے کے نجی استعمال سے متعلق اہم انکشاف کرتے ہوئے بتایا تھا کہ وزیراعلیٰ پنجاب طیارے کے استعمال کا پہلا سرکاری چالان مریم نواز کے نام 14 ستمبر کو جاری کیا گیا تھا، جس کی کل رقم 2 کروڑ 93 لاکھ 65 ہزار 976 روپے مقرر کی گئی تھی، تاہم اس چالان کے اجراء کے بعد ایک ہی دن میں دو مرتبہ رقم میں ردوبدل کیا گیا اور باقاعدہ طور پر مریم نواز کو ترمیمی خطوط بھی ارسال کیے گئے۔

(جاری ہے)

Breaking
مریم نواز صاحبہ کے نام جہاز کے نجی استعمال کا خرچ سرکاری خزانے میں جمع کروانے کا پہلا چالان 14ستمبر کو جاری کیا گیا جو 2کروڑ 93 لاکھ 65ہزار 976روپے کا تھا ، آج دو مرتبہ اس چالان میں ردوبدل کیا گیا اور باقاعدہ مریم صاحبہ کو خط لکھا گیا ، دوسرا چالان 2کروڑ 80 لاکھ 37… https://t.co/MU3VSYemHo pic.twitter.com/3A5Hi1cpb0
— Syed Imran Shafqat (@SImranshafqat) September 16, 2026

اس حوالے سے سید عمران شفقت نے سماجی رابطے کی سائٹ ایکس پر جاری اپنی ایک پوسٹ میں بتایا کہ پہلے چالان کے بعد جاری کیے جانے والے دوسرے چالان میں رقم کم کر کے 2 کروڑ 80 لاکھ 37 ہزار 844 روپے کر دی گئی، اس کے بعد ایک اور ترمیم کے تحت تیسرا چالان جاری کیا گیا جس میں سرکاری طیارے کے نجی استعمال کا کل خرچ مزید کم کرکے 2 کروڑ 71 لاکھ 94 ہزار 4 روپے درج کیا گیا۔