نویڈیا کے سربراہ نے اے آئی کے خطرات سے متعلق خدشات کو مسترد کردیا

واشنگٹن (اُردو پوائنٹ اخبارتازہ ترین - این این آئی۔ 21 ستمبر2026ء) امریکی ٹیکنالوجی کمپنی نویڈیا کے سربراہ نے اس خیال کو مسترد کر دیا ہے کہ آئندہ چند برسوں میں آرٹی فیشل انٹیلی جنس (اے آئی)ٹیکنالوجی انسانیت کے خاتمے کا باعث بن جائے گی۔ایک انٹرویو کے دوران نویڈیا کے شریک بانی اور چیف ایگزیکٹو جینسن ہوانگ نے کہا کہ انتھروپک کے سابق محقق جیکب کوسن کی جانب سے سوشل میڈیا پر کیے جانے والے یہ دعوے کہ اے آئی ایک دہائی کے اندر انسانیت کا خاتمہ کر دے گی، غیر ذمہ دارانہ ہیں۔

انہوں نے کہا کہ 2030 دنیا کے خاتمے کا سال نہیں ہوگا اور ایسا 0 فیصد امکان ہے کہ 2030 میں دنیا کا خاتمہ ہو جائے گا، لوگوں کو ڈرانا غیر ضروری اور غیر ذمہ دارانہ ہے۔جیکب کوسن نے ایک ایکس کی پوسٹ میں کہا تھا کہ کمپنیوں کے درمیان خود کو بہتر بنانے والے سپر انٹیلی جنس سٹمز کی تیاری کا مقابلہ ہو رہا ہے اور ہماری زندگیوں کے ساتھ کھیلا جا رہا ہی'۔

(جاری ہے)

جیکب کوسن نے کہا کہ اس ٹیکنالوجی کی طاقت کو نظر انداز مت کریں، یہ خود کو ایسے طاقتور سسٹمز میں تبدیلی کرسکتی ہے جو کسی بھی چیز کو ہیک کرلیں گے، کسی بھی شعبے کو راتوں رات انقلابی انداز سے بدل دیں گے جبکہ اختیار اور وسائل کو حاصل کرلیں گے، ہم سب اس پیشرفت کو دیکھ رہے ہیں اور اس پیشرفت کی رفتار میں سست نہیں ہو رہی۔انہوں نے کہا کہ لوگوں کی جانب سے اس یقین کے ساتھ اے آئی سسٹمز تیار کیے جا رہے ہیں جو اس دہائی کے اختتام تک ہم سب کو مارنے کی صلاحیت رکھتے ہوں گے۔

امریکی قانون سازوں کی جانب سے خطرات کے حوالے سے اے آئی کمپنیوں پر تنقید کی گئی جبکہ انتھروپک کے چیف ایگزیکٹو نے داریو اموڈے نے اے آئی کی ترقی کی رفتار فوری طور پر سست کرنے کی اپیل کرتے ہوئے کہا تھا کہ ایسا نہ ہوا تو 6 سے 12 مہینوں میں باغی اے آئی ایجنٹس انٹرنیٹ کو ہائی جیک کرسکتے ہیں، جس سے کھربوں ڈالر کا نقصان ہوسکتا ہے۔اوپن اے آئی کے چیف ایگزیکٹو سام آلٹمین اور ایلون مسک کی جانب سے بھی اس ٹیکنالوجی میں پیشرفت کی رفتار کو سست کرنے کا مطالبہ کیا گیا تھا مگر امریکی صدر ڈونلڈ ٹرمپ نے اے آئی میں پیشرفت کے حوالے سے موجود خدشات کو مسترد کرتے ہوئے اسے سازش اور افواہ قرار دیا۔

جینسن ہوانگ نے زور دیا کہ اے آئی سے انسانیت کے خاتمے کی پیشگوئیوں کی تصدیق سائنس کی جانب سے نہیں کی گئی۔انہوںنے کہاکہ ہماری کمپنی کی کامیابی براہ راست پراڈکٹس اور سروسز کی محفوظ تیاری سے منسلک ہے، اگر ہم ایسا نہ کریں تو ہماری کمپنی کی قدر گھٹ جائے گی۔