چین کو آزادانہ اور خودمختار امن پسند خارجہ پالیسی پر کاربند رہنا چاہیے،صدرشی جن پنگ

جمعرات 1 اکتوبر 2026 12:06

بیجنگ (اُردو پوائنٹ اخبارتازہ ترین - اے پی پی۔ 01 اکتوبر2026ء) چین کے صدر شی جن پنگ نے کہا ہے کہ چین کو آزادانہ اور خودمختار امن پسند خارجہ پالیسی پر کاربند رہنا اور چار گلوبل انیشی ایٹوز پر عمل درآمد کو آگے بڑھانا چاہیے ۔ سی جی ٹی این کے مطابق انہوں نے گزشتہ رات کو چین کے قیام کی 77ویں سالگرہ کے موقع پربیجنگ کے عظیم عوامی ہال میں منعقدہ استقبالیہ تقریب سے خطاب کرتے ہوئے اس بات پر زور دیا کہ طویل عرصے کی جستجو اور عملی تجربات کے بعد چینی خصوصیات کے حامل سوشلزم کے نظام نے اپنی عظیم برتری ثابت کی ہے، چین کے قومی طرز حکمرانی اور حکمرانی کی صلاحیتوں کی جدیدیت کی سطح مسلسل بلند ہوئی ہے ۔

انہوں نے کہا کہ چینی قوم کی عظیم نشاۃِ ثانیہ کا حصول ناقابلِ روک عمل بن چکا ہے، جب تک ہم پختہ اعتماد کے ساتھ اپنے اہداف پر توجہ مرکوز رکھتے ہوئے قدم بہ قدم ٹھوس انداز میں آگے بڑھتے رہیں گے کامیابی عظیم کمیونسٹ پارٹی آف چائنا، عظیم چینی عوام اور چین ہی کی ہوگی۔

(جاری ہے)

صدر نے کہا کہ گزشتہ 77 سال کے دوران ہماری پارٹی نے عوام کو متحد کرتے ہوئے انتھک جدوجہد کی جس کے نتیجے میں تیز رفتار اقتصادی ترقی اور طویل مدتی سماجی استحکام قائم ہوا، ہم نے خوشحال معاشرے کی ہمہ گیر تکمیل کے پہلے صد سالہ ہدف کو حاصل کیا اور اب سوشلسٹ جدید طاقتور ملک کی ہمہ گیر تعمیر کے دوسرے صد سالہ ہدف کی جانب بھرپور انداز میں آگے بڑھ رہے ہیں۔

انہوں نے کہا کہ اس وقت ہم دنیا بھر کی توجہ حاصل کرنے والی چین کی عظیم کامیابیوں پر بے حد فخر محسوس اور چینی طرز جدیدیت کے روشن مستقبل پر مکمل اعتماد رکھتے ہیں۔ چینی صدر نے زور دیا کہ چین کو آزادانہ اور خودمختار امن پسند خارجہ پالیسی پر کاربند رہنا چاہیے، چار گلوبل انیشی ایٹوز پر عمل درآمد کو آگے بڑھانا چاہیے اور انسانیت کے ہم نصیب معاشرے کی تعمیر کو فروغ دینا چاہیے تاکہ تغیرات اور انتشار سے دوچار دنیا میں مزید استحکام اور مثبت توانائی شامل کی جا سکے۔

تقریب میں خوشگوار موسیقی کی دھنوں کے درمیان چین اور دیگر ممالک سے تعلق رکھنے والے مہمانوں نے چین کے قیام کی 77ویں سالگرہ کی خوشی منائی، چین کی خوشحالی اور عوام کی خوشی و سلامتی کے لیے نیک خواہشات کا اظہار کیا اور چینی عوام اور دنیا کے مختلف ممالک کے عوام کے درمیان دیرپا دوستی کے لیے نیک تمنائوں کا اظہار کیا۔