بین الاقوامی اسلامی یونیورسٹی کا کفایت شعاری اور ایندھن کی بچت کے اقدامات پر عملدرآمد کا فیصلہ

اسلام آباد (اُردو پوائنٹ اخبارتازہ ترین - اے پی پی۔ 25 ستمبر2026ء) بین الاقوامی اسلامی یونیورسٹی اسلام آباد نے وفاقی حکومت کی جانب سے جاری کفایت شعاری اور ایندھن کی بچت کے اقدامات پر عملدرآمد کا فیصلہ کیا ہے۔یونیورسٹی کے ڈائریکٹوریٹ آف سٹریٹجک پلاننگ اینڈ گورننس کی جانب سے جاری نوٹیفکیشن کے مطابق یکم اکتوبر 2026 سے تین ماہ کے لئے سرکاری گاڑیوں کے لئے ایندھن کی فراہمی میں 50 فیصد کمی کی جائے گی تاہم آپریشنل گاڑیوں اور ضروری خدمات کو اس سے مستثنیٰ رکھا گیا ہے۔

نوٹیفکیشن کے مطابق مالی سال 2026-27 کے دوران نان ای آر ای بجٹ میں پانچ فیصد کمی کی جائے گی اور یہ کٹوتی ماہانہ بنیادوں پر کی جائے گی۔ تمام اقسام کی گاڑیوں اور آئی ٹی سے متعلق خریداری کے علاوہ دیگر پائیدار اشیا کی خریداری پر بھی مکمل پابندی ہوگی۔

(جاری ہے)

اسی طرح تین ماہ کے لئے بیرون ملک سرکاری دوروں اور سفری سرگرمیوں پر مکمل پابندی ہوگی تاہم بین الاقوامی ترقیاتی شراکت داروں کی جانب سے فراہم کردہ وظائف، اقتصادی امور ڈویژن کے تحت منعقد ہونے والی تربیت و کورسز اور حکومت پاکستان کے ادارہ جاتی معاہدوں کے تحت ہونے والے دورے اس پابندی سے مستثنیٰ ہوں گے۔

ناگزیر بیرون ملک دوروں کی صورت میں بھی صرف اکانومی کلاس میں سفر کیا جائے گا۔ نوٹیفکیشن میں کہا گیا ہے کہ اجلاس ترجیحاً ویڈیو کانفرنسنگ کے ذریعے منعقد کئے جائیں گے تاہم بین الاضلاعی نہیں بلکہ بین الشہری نوعیت کے اجلاس اس پابندی سے مستثنیٰ ہوں گے۔ غیر ملکی وفود کی میزبانی کے علاوہ سرکاری عشائیوں کے انعقاد پر بھی پابندی ہوگی۔ حکومت کی جانب سے مالی اعانت فراہم کئے جانے والے سرکاری سیمینارز، تربیتی پروگراموں اور کانفرنسوں کے انعقاد پر بھی مکمل پابندی عائد کی گئی ہے۔

ناگزیر صورت میں ایسے پروگرام سرکاری آڈیٹوریمز، کمیٹی رومز اور دیگر سرکاری سہولیات میں منعقد کئے جائیں گے جبکہ شرکاء کے لئے صرف ایک ڈش پیش کی جائے گی۔ یونیورسٹی کے تجارتی مراکز کو کابینہ ڈویژن کی جانب سے مقرر کردہ مارکیٹ بندش کے اوقات کے مطابق بند کرنے کی ہدایت بھی کی گئی ہے۔نوٹیفکیشن کے مطابق ترقیاتی منصوبوں کے لئے ایندھن میں کمی، نان ای آر ای بجٹ میں کمی اور گاڑیوں و پائیدار اشیا کی خریداری پر عائد پابندیاں لاگو نہیں ہوں گی۔

جہاں ضروری ہو استثنیٰ کی درخواستیں ڈائریکٹوریٹ آف سٹریٹجک پلاننگ اینڈ گورننس کے رابطہ سیکشن کے ذریعے متعلقہ وزارتوں کو بھجوائی جائیں گی۔ یہ اقدامات صدر/قائم مقام ریکٹر بین الاقوامی اسلامی یونیورسٹی اسلام آباد کی منظوری سے جاری کئے گئے ہیں اور تمام متعلقہ افسران و شعبہ جات کو ان پر عملدرآمد کی ہدایت کی گئی ہے۔