Lahore Police releases emergency app in collaboration with PITB

لاہور پولیس نے شہریوں کے لیے ایمرجنسی ایپلی کیشن جاری کر دی

لاہورپولیس نے شہریوں کے لیے ایک ایمرجنسی ایپلی کیشن جاری کی ہے۔ اس ایپلی کیشن کو پنجاب انفارمیشن ٹیکنالوجی بورڈ کے تعاون سے بنایا گیا ہے۔
ڈی آئی جی آپریشنز ڈاکٹر حیدر اشرف کے مطابق یہ پاکستانی معاشرے سے تھانہ کلچر اور اس سے منسلک منفی چیزوں کو بتدریج ختم کرنے کے لیے اہم پیش رفت ہے۔

اس ایپلی کیشن کا انٹرفیس بہت سادہ ہے۔ایپلی کیشن میں لمبے چوڑے مینو کی بجائے آپشنز کو سادہ اندازہ میں پیش کیا گیا ہے۔ایپلی کیشن کو لانچ کریں تو اس میں تین آپشنز سامنے آتے ہیں جن کو استعمال کرتے ہوئے ریسکو 15 پر کال کی جا سکتی ہے، دہشت گردی کی سرگرمیوں کی اطلاع دی جا سکتی ہے اور شکایت بھی درج کرائی جا سکتی ہے۔

اس ایپلی کیشن کو استعمال کرنے سے پہلے ضروری ہے کہ صارفین اس ایپلی کیشن میں رجسٹر ہوں۔

(جاری ہے)

رجسٹریشن کے لیے صارفین کو اپنا فون نمبر، شناختی کارڈ نمبر اور گھر کے نزدیک ترین تھانے کے بارے میں معلومات دینی پڑتی ہیں۔ اس کے بعد صارفین کو 15 پر کال کر کے اکاؤنٹ کی تصدیق کرنی پڑتی ہے۔

ایک دفعہ اکاؤنٹ کی تصدیق ہونے کے بعد صارفین ان تینوں فیچرز کو استعمال کر سکتےہیں۔اس ایپلی کیشن کو استعمال کرنے والے صارفین ٹیکسٹ رپورٹ کرنے کے ساتھ ساتھ واقعے سے متعلق تصاویر بھی بھیج سکتے ہیں۔ اس کے علاوہ صارفین اپنی پہلے سے درج شدہ رپورٹ کا سٹیٹس بھی جان سکتے ہیں۔

صارفین کے لیے ایک آپشن ایپلی کیشن سے ہی براہ راست 15 پر کال کر نے کا بھی ہے۔
ہنگامی حالات کے لیے ایپلی کیشن میں ایک SOSبٹن ہے۔اس بٹن کو دباتے ہی پولیس کو اپنے سرور سے آپ کی لوکیشن معلوم ہوجاتی ہے اور ایک ٹیم کو آپ کی موجودہ لوکیشن پر بھیج دیا جاہے۔

اپنے ایک بیان میں ڈی آئی جی آپریشنز ڈاکٹر حیدر اشرف نے کہا کہ اس ایپلی کیشن کے غلط یا تفریحی مقاصد کے لیے استعمال کرنے والوں کے خلاف سخت ایکشن لیا جائے گا۔
اینڈروئیڈ صارفین اس ایپلی کیشن کو یہاں سے ڈاؤن لوڈ کر سکتے ہیں۔