Pakistani Wafd Ka Mobile World Congress Spain Ka Dora

‫پاکستانی وفد کا موبائل ورلڈ کانگرس سپین کا دورہ. تھری جی اور فور جی بارے تفصیلی بریفنگ حاصل کی‬

وزیر مملکت برائے انفارمیشن ٹیکنالوجی مسز انوشہ رحمن کی زیر قیادت پاکستانی وفد (جوکہ موبائیل ورلڈ کانگرس میں شرکت کرنے کیلئے بارسلونا گیا ہوا ہے)نے اریکسن پویلین کا دورہ کیا۔

اس موقع پر اریکسن کے ماہرین نے وفد کے شرکاء کو جدید تکنیکی آلات اور تھری جی ۔

فور جی ، ایل ٹی ای اورفائیو جی کے بارے میں مفصل بریفنگ دی اور ماحولیاتی تحفظ کے پیش نظر دیہی علاقوں میں لگائے جانے والے خصوصی آلات سے بھی آگاہ کیا۔ وزیر مملکت نے فائیو جی کی صنعت ، کم طاقت والے بی ٹی ایس جو کہ سٹریٹ لائٹس کے ساتھ منسلک ہوتے ہیں ، براڈ بینڈ ایکسیلیٹرز میں گہری دلچسپی کا اظہار کیا کیونکہ یہ آلات پاکستان میں تھری جی اور فور جی کے نیٹ ورک کے آغاز میں بروئے کار لائے جاسکتے ہیں اور ان سے استفادہ کیا جاسکتا ہے۔

(جاری ہے)

وفد نے اریکسن کے سینئر نمائندگان سے بھی ملاقات کی اور وزیر مملکت نے انہیں پاکستان میں متعارف کرائے جانے والے نئے سپکٹرم کی نیلامی کے بعد پاکستان میں ان نئے تکنیکی آلات کی تنصیب کی ضرورت اور آفادیت سے روشناس کرایا۔

انہوں نے مزید کہا کہ نئے سپکٹرم کی آمد کے بعد ماحولیاتی تحفظ کو یقینی بنانے کیلئے اریکسن جیسی کمپنیاں اہم کردار ادا کرسکتی ہیں۔

اریکسن ٹیم نے جلد پاکستان آمدپر آمادگی کا اظہار کیاتاکہ وہ یہاں آکر جدید تکنیکی مصنوعات کی تیاری اور آلات کی تنصیب کے ذریعے ٹیکنالوجی کی ترویج کے نئے مواقع پیدا کرسکیں۔

اس اجلاس میں پوری دنیا سے ایک لاکھ کے قریب ٹیکالوجی کے شعبے سے تعلق رکھنے والے ماہرین ،پالیسی ساز شخصیات اور مندوبین شریک ہیں.