Yahoo Mail app gets a major update

یاہو میل ایپلی کیشن کی میجر اپ ڈیٹ

یاہو نے اپنی میل ایپلی کیشن کے لیے میجر اپ ڈیٹ جاری کی ہے۔ ایپلی کیشن میں ایک نیا فیچر شامل کیا گیا ہے ، جس کا نام یاہو اکاؤنٹ کی(Yahoo Account Key) ہے۔اس فیچر کی مدد سے صارفین بغیرپاس ورڈ کے اکاؤنٹ میں لاگ ان ہو سکتے ہیں۔ پاس ورڈ کی بجائے یہ ایپلی کیشن صارفین کے فون پر ایک کوڈ بھیجے گی۔

اس کوڈ کو لکھنے سے اکاؤنٹ میں لاگ ان ہوا جا سکتا ہے۔ ہربار صارفین کو نیا کوڈ ملے گا۔
یاہو کے پراڈکٹ منیجمنٹ کے وائس پریزیڈنٹ ڈیلان کیسے کا کہنا ہے کہ اکاؤنٹ کی کے فیچر کو فنگر پرنٹ سکینر اور چہرہ شناشی تک پھیلایا جا سکتا ہے۔

کچھ بھی ہو اب صارفین کو پاس ورڈ یاد رکھنے کی ضرورت نہیں رہے گی۔
فون چوری ہونے کی صورت میں صارفین سیکنڈری ای میل ایڈریس کو لاگ ان کے لیے استعمال کر سکتے ہیں۔

(جاری ہے)

یاہو نے ایپلی کیشن میں ایک نیا فیچر تھرڈ پارٹی اکاؤنٹ کا بھی شامل کیا ہے، جس کے تحت صارفین یاہو میں لاگ ان ہوتے ہوئے آؤٹ لک اور دوسری میل سروسز کی ای میل چیک کر سکتے ہیں۔

اس فیچر کی مدد سے فی الوقت جی میل اور کارپوریٹ آؤٹ لک کی ای میل چیک نہیں کی جاسکتی۔ یاہو اس پر بھی کام کر رہا ہے، جلد ہی ان سروسز کی ای میل بھی ایپلی کیشن میں دیکھی جا سکیں گی۔
ایپلی کیشن میں اب صارفین کو اجازت ہو گی کہ وہ اپنے رابطوں میں ان کے فیس بک اکاؤنٹ کی پروفائل تصاویر لگا سکیں۔

کمپنی کی طرف سے آنے والی ای میلز کے سامنے کمپنی کا لوگو نظر آئے گا۔ سیکورٹی کے لحاظ سے یہ کافی اہم فیچر ہے۔ اگر کسی کو بنک کی جانب سے ای میل موصول ہو اور ساتھ لوگو نہ ہو تو سمجھ جائیے کہ فراڈ اور سپام ای میل ہے۔
ایپلی کیشن اینڈروئیڈ اور آئی او ایس کے لیے دستیاب ہے۔ ایپل آئی فون 6ایس اور آئی فون 6 ایس پلس کےلیے یہ ایپلی کیشن 3 ڈی ٹچ ان ایبل ہے۔