سندھ زرعی یونیورسٹی ٹنڈوجام میں موسمیاتی تبدیلی و غذائی تحفظ کے چیلنجز سے نمٹنے کے حوالے سے تربیتی سیشن کا انعقاد

حیدرآباد (اُردو پوائنٹ اخبارتازہ ترین - اے پی پی۔ 01 مئی2024ء) سندھ زرعی یونیورسٹی ٹنڈوجام نے موسمیاتی تبدیلی اور غذائی تحفظ کے چیلنجز سے نمٹنے کیلئے زرعی توسیعی کارکنان کیلئے سہ روزہ تربیتی سیشن کا انعقاد کیا ۔ یونیورسٹی کے ماہرین نے ضلع ٹھٹہ کے ایگریکلچر ایکسٹیشن کے عملے کو مختلف موضوعات پر عملی تربیت دی۔تفصیلات کے مطابق سندھ زرعی یونیورسٹی کی زیر نگرانی اور اسلامک ریلیف پاکستان، اور نارویجین سفارتخانہ کے تعاون سے زراعت میں موسمیاتی مضبوطی اور استحکام کو فروغ دینے اور سندھ کے کوسٹل کمیونٹیوں کی زرعی پیداوار میں اضافے اور غذائی تحفظ کے چیلنجز سے نمٹنے کیلئے سہ روزہ تربیتی سیشن منعقد کیا گیا جوکہ خصوصی طور پر سندھ کے ضلع ٹھٹہ کے زرعی توسیع کے کارکنان کی تربیت کیلئے منعقد کیا گیا تھا۔

(جاری ہے)

اس موقع پر سندھ زرعی یونیورسٹی ٹنڈوجام کے وائس چانسلر پروفیسر ڈاکٹر فتح مری نے افتتاحی تقریب کے دوران اپنے خطاب میں تربیتی کارکناں کو ضروری ٹیکنالوجی اور مہارتوں سے آراستہ کرنے کی اہمیت پر زور دیا۔انہوں نے کہا کہ زرعی توسیع کاروں کو پیشہ ورانہ طریقے سے سندھ کی زرعی ترقی، کسانوں کی رہنمائی اور ان میں جدید ٹیکنالوجی کی اہمیت کو بڑھانے کیلئے کردار ادا کرنا ہوگا اور ان پر بھاری ذمہ داری عائد ہوتی ہے کہ وہ کسانوں کی زرعی فیلڈ میں جاکر ان موضوعات پر معاونت کریں، پروفیسر ڈاکٹر محمد اسماعیل کمبھر نے تربیت کے اہداف پر روشنی ڈالتے ہوئے کہا کہ ایگریکلچر ایکسٹیشن کے کارکنان کو کوسٹل کمیونٹیوں کو موسمیاتی برداشت کے پائیدار زرعی اصولوں کیلئے تربیت اور مشورے دینے ہونگے۔

انہوں نے کہا کے زرعی توسیع کاروں کو پسماندہ علاقوں میں خوشحال زندگی بسر کرنے کیلئے وسائل کے مناسب استعمال اور تکنیکوں کی فراہمی کے لیے زرعی ترقی کے کامیاب طریقوں کی آگہی دینی ہوگی، اسلامک ریلیف پاکستان کی طرف سے خادم حسین سومرو نے سندھ کی کمیونٹیوں کو بہتر معیشت فراہم کرنے کی تجدید عہد کیا۔ انہوں نے تربیت کی اہمیت پر گفتگو کرتے ہوئے زرعی توسیع کاروں کی معلومات اور مہارتوں کو بڑھانے پر اپنے خیالات کا اظہار کیا۔اس تربیتی سیشن میں ٹھٹھہ ضلع کے زرعی توسیع کاروں کی فعال شرکت ہوئی، اس تربیت کے دوران سندھ زرعی یونیورسٹی کے فیکلٹی ممبران اور ماہرین نے موسمیاتی مضبوط زرعی اصولوں کے عملدرآمد کیلئے ٹیکنیکل کورس کے ساتھ تجربات بھی کرائے۔