گلگت بلتستان کو ایک ترقی یافتہ اور خوشحال خطہ دیکھنا میری زندگی کا مشن اور خواب ہے، صدر مملکت آصف علی زرداری کی پاکستان پیپلز پارٹی پارلیمنٹیرینز گلگت بلتستان کے وفد سے گفتگو

اسلام آباد (اُردو پوائنٹ اخبارتازہ ترین - اے پی پی۔ 15 مئی2024ء) صدر مملکت آصف علی زرداری نے گلگت بلتستان میں ہمہ موسمی روڈ انفراسٹرکچر بنانے کی ضرورت پر زور دیتے ہوئے کہا ہے کہ گلگت بلتستان کو ایک ترقی یافتہ اور خوشحال خطہ دیکھنا میری زندگی کا مشن اور خواب ہے، خطے میں بہتر ٹرانسپورٹ نظام سے تجارتی، اقتصادی اور سیاحتی سرگرمیوں کو فروغ حاصل ہونے کے ساتھ ساتھ مسلسل اور قابل اعتماد نقل و حمل یقینی بنانے میں مدد ملے گی۔

ایوان صدر کے پریس ونگ کے مطابق ان خیالات کا اظہار صدر مملکت نے پاکستان پیپلز پارٹی پارلیمنٹیرینز گلگت بلتستان کے صدر امجد حسین ایڈووکیٹ کی قیادت میں ایک وفد سے گفتگو کرتے ہوئے کیا جس نے بدھ کو یہاں ایوان صدر میں ان سے ملاقات کی۔ صدر مملکت نے کہا کہ گلگت بلتستان پورے ملک کی ترقی کا انجن ثابت ہو سکتا ہے۔

(جاری ہے)

انہوں نے گلگت بلتستان میں ترقیاتی سرگرمیوں کو تیز کرنے کی ضرورت پر زور دیا اور کہا کہ گلگت بلتستان میں کارڈیالوجی ہسپتال اور نرسنگ کالج کے قیام کیلئے ترجیحی بنیادوں پر اقدامات کیے جائیں گے۔

آصف علی زرداری نے کہا کہ سکردو اور گلگت کے درمیان ہمہ موسمی سڑکوں اور سرنگوں کی تعمیر سے کاروبار کیلئے رسد اور نقل و حمل میں بہتری آئے گی۔ انہوں نے کہا کہ گلگت بلتستان میں بہتر ٹرانسپورٹ نظام سے سامان کی نقل و حرکت ، روابط میں اضافہ ہوگا، بہتر ٹرانسپورٹ سے صحت، تعلیم اور روزگار کے مواقع جیسی خدمات تک لوگوں کی رسائی میں بھی اضافہ ہوگا۔

صدر مملکت نے گلگت بلتستان میں سیاحت کے فروغ کیلئے گلگت کے ہوائی اڈے کو بہتر بنانے کی ضرورت پر بھی زور دیا۔ انہوں نے کہا کہ گلگت بلتستان کے شعبہ صحت میں اقدامات سے لوگوں کو دہلیز پر صحت کی اعلیٰ معیاری خدمات فراہم کی جاسکیں گی، خطے میں صحت اور تعلیمی سہولیات کی فراہمی سماجی و اقتصادی ترقی ، خوشحالی کیلئے ناگزیر ہے۔ صدر مملکت نے کہا کہ گلگت بلتستان میں سیاحت سمیت اقتصادی ترقی اور تجارتی سرگرمیوں کے وسیع امکانات ہیں، گلگت بلتستان کی ہائیڈرو الیکٹرک صلاحیت کو مقامی اور قومی توانائی کی ضروریات پورا کرنے کیلئے استعمال کیا جانا چاہیے۔

وفد نے صدر مملکت کو گلگت بلتستان کے لوگوں کو درپیش مسائل سے آگاہ کیا اور سیاحت ، اقتصادی سرگرمیوں کے فروغ اور بلاتعطل بجلی کی فراہمی کے علاوہ گلگت بلتستان کے صحت اور تعلیم کے بنیادی ڈھانچے کی ترقی کی ضرورت پر زور دیا۔ وفد نے کہا کہ موسمیاتی تبدیلیوں کے اثرات کم کرنے کیلئے اقدامات کی ضرورت ہے ۔ وفد نے صدر مملکت کو گلگت بلتستان کے ماحولیاتی مسائل کے بارے میں بھی بتایا۔ وفد نے کہا کہ جنگلات کے فروغ خصوصاً اخروٹ کے درختوں کی شجرکاری سے پگھلتے گلیشیئرز کو بچانے میں مدد مل سکتی ہے۔ صدر مملکت نے وفد کو گلگت بلتستان کی ترقی کے لیے اپنے تعاون کا یقین دلایا۔