پاکستان جرمنی کو یورپ میں اپنا ایک اہم شراکت دارتصور کرتا ہے‘ وزیراعظم

اسلام آباد(اُردو پوائنٹ اخبارتازہ ترین - آن لائن۔ 21 مئی2024ء) وزیراعظم محمد شہباز شریف نے کہا ہے کہ پاکستان جرمنی کے ساتھ اپنے دیرینہ تعلقات کو قدر کی نگاہ سے دیکھتا ہے‘پاکستان جرمنی کو یورپ میں اپنا ایک اہم شراکت دار تصور کرتا ہے۔ وزیراعظم سے جرمنی کی این جی او گلوبل بریجز، برلن کے وفد نے ملاقات کی ۔وفد میں گلوبل بریجز کے چیئرمین بورڈ آف ڈائریکٹرز، ہینس ایلبرٹ، چیف ایگزیکٹو آفیسر، نکولس البرچٹ اور جرمنی سے تعلق رکھنے والے کاروباری افراد اور سرمایہ کار شامل تھے۔

ملاقات میں پاکستان میں تعینات جرمنی کے سفیر عزت مآب الفریڈ گرینیس بھی موجود تھے۔وزیراعظم نے وفد سے جرمن زبان میں گفتگوکی جس پر وفد کے شرکاء وزیر اعظم کی جرمن زبان میں بات چیت سے محظوظ ہوئے اور داد دئے بغیر نا رہ سکے۔

(جاری ہے)

جرمن وفد کے سربراہ نے وزیراعظم کی جرمن زبان میں گفتگو پر وزیراعظم کا شکریہ ادا کیا۔وزیراعظم نے کہا کہ پاکستان جرمنی کے ساتھ اپنے دیرینہ تعلقات کو قدر کی نگاہ سے دیکھتا ہے‘پاکستان جرمنی کو یورپ میں اپنا ایک اہم شراکت دار تصور کرتا ہے‘ وزیراعظم نے دوطرفہ تجارت اور سرمایہ کاری کی موجودہ سطح کو مزید وسعت دینے کی خواہش کا اظہارکرتے ہوئے کہا کہ پاکستان میں جرمن سرمایہ کاری میں اضافے کے وسیع امکانات موجود ہیں۔

پاکستان اور جرمنی کے درمیان صنعت،متبادل توانائی، معدنیات، آئی ٹی، زراعت اور دیگر شعبوں میں تعاون بڑھانے کے لئے پر عزم ہیں۔وزیراعظم کا کہنا تھا کہ پاکستان سے کاربن اخراج کی شرح انتہائی کم ہونے کے باوجود ہم ماحولیاتی تبدیلی کے اثرات سے سب سے زیادہ متاثرہ ممالک میں سے ایک ہے۔متبادل توانائی،موسمیاتی تبدیلی، زراعت اور غذائی تحفظ کے حوالے سے جرمنی کے تجربے سے فائیدہ اٹھانا چاہتے ہیں۔

پاکستان کی افرادی قوت کو معیاری تربیت فراہم کر کے ان کی استعداد میں اضافہ کیا جا رہا ہے تا کہ وہ بیرون ملک بھی اپنا ہنر دکھا سکیں۔وفد نے پاکستان کی کاربن کریڈٹ مارکیٹ میں سرمایہ کاری میں دلچسپی کا اظہارکیاجبکہ پاکستان میں موسمیاتی تبدیلی اور زراعت کے شعبوں میں سرمایہ کاری کے حوالے سے بھی اظہار دلچسپی کیا گیا۔ملاقات میں وفاقی وزیر تجارت جام کمال خان، وفاقی وزیر صنعت و پیداوار رانا تنویر حسین، وفاقی وزیر اطلاعات و نشریات عطاء اللہ تارڑ، وزیر مملکت برائے انفارمیشن ٹیکنالوجی و ٹیلی کام شزا فاطمہ اور متعلقہ اعلیٰ سرکاری افسران نے شرکت کی۔